Një ndër emrat më të njohur të BDI-së, Izet Mexhiti, që është njëherësh nënkryetar i kësaj partie dhe kryetar i komunës më të madhe shqiptare të Shkupit, asaj të Çairit, njoftuar se nuk do të rikandidohet për zgjedhjet e ardhshme lokale. Vendimi i tij vjen vetëm disa muaj para zgjedhjeve lokale dhe disa muaj pas humbjes së thellë të BDI-së në këtë komunë në zgjedhjet e fundit të parakohshme parlamentare. Nëse dikur komuna e Çairit llogaritej si bastion i BDI-së, me daljen në skenë të BESËS kjo nuk ekziston më, pasi kishte pikërisht kjo forcë që e mundi me vota në Çair.
Marrë parasysh rrezikun e humbjes eventuale në zgjedhjet e ardhshme lokale, edhe atë duke qenë nënkryetar partie me ambicie për ta zëvendësuar kryetarin e BDI-së, Ali Ahmeti, vendimi i Mexhitit ishte i pritur për opinionin.
Nga ana tjetër nuk përjashtohet mundësia që Izet Mexhiti të jetë pjesë e funksionarëve me poste ministror në qeverinë e ardhshme të LSDM-BDI.
Më poshtë keni statusin e plotë të Izet Mexhitit:
“…dëshiroj të bëj publik vendimin tim për të mos kandiduar në zgjedhjet e ardhshme lokale për të drejtuar Komunën e Çairit. Pas tre manadatesh dhe dymbëdhjetë vjetësh, ka ardhur koha që t’u krijohet hapësirë dhe mundësi gjeneratave të reja të strukturës sonë politike për të dhënë kontributin e tyre me dije, aftësi dhe përgjegjësi.
Për mua ka qenë nder që kam bërë historinë si Kryetar i parë i një komune me shumicë shqiptare në Shkup, që doli si obligim nga Marrëveshja e Ohrit. Por tani është koha të tërhiqem, dhe me gjithë eksperiencën dhe dijen e fituar gjatë këtyre viteve, të radhitem si ushtari më besnik i Kryetarit të ardhshëm të Komunës nga radhët e Bashkimit Demokratik për Integrim”, thuhet në statusin e tij të shpërndarë në faqen e FB. Por si reagim, nuk kanë munguar fotot me gjendjen e infrastukturës në Çair, duke ia atribuar këtë gjendje drejtimit të Mexhitit. /tesheshi.com/
