Rrjetet sociale, Facebook dhe Twitter janë sot një platformë e padiskutueshme komunikimi edhe për politikën. Besohet se Donald Trump fitoi mbështetësit me mesazhet e tij të shkurtra në Twitter, platforma ku ai komunikoi për çdo gjë dhe në kohë reale gjatë gjithë fushatës së tij elektorale.
Po në Shqipëri çfarë po ndodh?
Një politikan tradicional dhe në moshë të thyer si Sali Berisha e kuptoi ndryshimin radikal që solli bota e internetit dhe iu përshtat me shpejtësi duke hapur faqen e tij në facebook, shumë popullore, ku ai komunikon me ndjekësit, votuesit e PD-së dhe sulmon kundërshtarët. Nuhatja e tij për rëndësinë e këtij komunikimi shpiku dhe “qytetarin dixhital” të cilit i vinte autorësinë e akuzave gjithfarëlloj për qeverinë. “Qytetari dixhital” i Berishës ishte ai që “kanabizoi” vendin më shumë se një vitë më parë, edhe pse shumë foto që shiteshin si fshatra shqiptarë të mbuluar nga hashashi dolën që ishin shkrepur në Kolumbi.
Sot Berisha është një ish-kryeministër dhe ish-kryetar PD-ja, por në facebook ka më shumë ndjekës dhe fansa se pasardhësi i tij në parti dhe kandidati për kryeministër, Lulzim Basha. Nga ana tjetër, kryeministri Edi Rama është një mjeshtër i PR-t në rrjetet sociale; ai jo vetëm ka shumë ndjekës por dhe mënyra se si e mban veten të lidhur vazhdimisht me shikueshmërinë e publikut është unike duke krijuar një kanal të tij të komunikimit ku mijërave vetë e shohin dhe qindra e komentojnë çdo ditë në çdo aktivitet që shfaq në facebook.
Beteja e shikueshmërisë
Po të bësh sot një votim në facebook se kush ndiqet e pëlqehet më shumë mes dy kundërshtarëve politikë Basha dhe Rama, kryeministri është një fitues i padiskutueshëm. Dreka në shtëpinë e një banori të fshtatit Hoxharë në Fier e trasmetuar live nga Rama në facebook është parë për 2 orë ka më shumë se 70 mijë shikimie, ka afro 4 mijë like dhe afro 800 komente. Nga ana tjetër, në të njëjtën kohë në faqen e Bashës shfaqej protesta dhe fjalimi i tij në çadër, një video që ka 19 mijë shikime dhe më shumë se 1 mijë like.
Për nga rëndësia që kanë këto aktivitete duket marrëzi që një protestë opozitare, ku kërkohen zgjedhje të lira, qeveri teknike, ku flitet për vendin e kapur nga droga, etj… të tërheqë më pak vëmendjen e njerëzve se sa një vizitë kortezie në një familje të thjeshtë, ku Rama bën batuta të tipit: “Jemi Englantinës të hajë se kjo ha shumë”.
Epërsia e Ramës në komunikim të drejpërdrejtë me publikun nuk është momentale. Ai ka mbajtur gjatë gjithë mandatit një komunikimt të vazhdueshëm duke dhënë intervista live çdo të dielë në facebook e Twitter, ku iu përgjigjet drejpërdrejt pyetjeve të njerëzve; dhe më tej, duke mos shmangur nga faqja ata që e shajnë e kritikojnë, por kthyer përgjigje të gjithëve vetë.
Kjo është beteja e shikueshmërisë dhe e pëlqueshmërisë në rrjetet sociale, aty ku të paktën shumica e të rinjve kalojnë një pjesë të mirë të kohës. Se sa mund të ndikojnë votat virtuale në një garë reale në zgjedhje kjo mbetet për t’u parë më 18 qershor.
Rama e tregoi epërsinë e tij në këtë rrjet komunikimi edhe kur shpërndau live protestën e 18 shkurtit të opozitës, e cila pati më shumë shikueshmëri tek ai se sa tek faqja e Bashës. Edhe vetë Basha e ka kuptuar se në Facebook e ka të humbur betejën me kundërshtarin, ndaj e ka harruar thirrjen që bëri ditët e para të protestës që të bojkotohen mediat tradicionale dhe të ndiqet facebooku. /tesheshi.com/
