Televizioni shtetëror kinez CCTV heqi nga transmetimi ndeshjen Arsenal-Manchester City, pas komenteve të Mesut Ozil për muslimanët ujgurë.
Sipas BBC-së, CCTV transmetoi ndeshjen midis Tottenham dhe Wolves të dielën në vend të derbit të madh anglez.
Ozil shkroi në mediat sociale atë që po ndodh me ujgurët, persekutimin e Kinës ndaj tyre. Ai shkroi se “Kurani është djegur në Kinë, xhamitë janë të mbyllura, shkollat teologjike dhe medreset janë të ndaluara”, e se sipas tij “muslimanët po heshtin për të gjitha vuajtjet e muslimanëve ujgurë.
“Dhëndri i Profetit Muhamed thotë: ‘Nëse nuk mund të parandaloni përndjekjen, flisni për të publikisht kundër saj'”, shkroi Ozil.
Arsenali menjëherë u distancua nga ky qëndrim publik i mesfushorit të tyre, duke theksuar se “klubi ka qenë gjithmonë apolitik si kolektiv”.
Gazeta kineze Global Times i quajti komentet e Ozil “gënjeshtra”, duke shtuar se ai “zhgënjeu” shumë njerëz në Kinë.
Federata Kineze e Futbollit gjithashtu tha që komentet e Ozil ishin “të papranueshme” dhe “dëmtonin ndjenjat” e tifozëve kinezë.
Muslimanët ujgurë janë një popull indigjen i Xinjiang, një rajon autonom në Kinën veriperëndimore. /tesheshi.com/
