SPAK kërkon nga Kuvendi, me anë të një shkrese, autorizim për arrestimin e Berishës, nëse jo në qeli, së paku në shtëpi.
Pikërisht, ajo që vetë ai kish kërkuar, duke mos pranuar të shkonte në “detyrim paraqitje” me pretendimin për shkelje Kushtetute, tashmë ka ndodhur.
Kjo bëri që Berisha mos mundej dot të nxirrte tjetër pretendim, duke deklaruar:
“Çfarëdo vendimi pas autorizimit të Kuvendit do ta respektoj pa asnjë diskutim. Qëndrimi im i përsëritur ka të bëjë me kushtetutshmërinë e vendit. Tani parlamenti të vendosë çfarë të dojë”, tha ai, pasi në Kuvend mbërriti shkresa ku thuhej:
“Mbështetur në nenin 73 të Kushtetutës së Republikës së Shqipërisë, nenin 231, 260, 288, 289 të K.Pr. Penale, si dhe në Rregulloren e Kuvendit të Republikës së Shqipërisë, nenet 13 dhe 118, bashkëlidhur ju përcjellim kërkesën për dhënien e autorizimit nga Kuvendi i Republikës së Shqipërisë, për arrestimin/heqjen e lirisë së deputetit Sali Berisha, nëpërmjet zëvendësimit të masës së sigurimit personal shtrëngues nga ajo e ‘Detyrimit për t’u paraqitur në policinë gjyqësore’, parashikuar nga neni 234 i K.Pr.Penale dhe ‘Ndalim i daljes jashtë shtetit’ parashikuar nga neni 233 i K.Pr.Penale, në atë të arrestit me burg/ arrest shtëpie, parashikuar nga nenet 238/237 të K.Pr.Penale, në kuadrin e proçedimit penal nr. 287 të vitit 2020, të Prokurorisë së Posaçme Kundër Korrupsionit dhe Krimit të Organizuar në Tiranë.
Gjithashtu në respektim të nenit 288 pika 2, të K.Pr.Penale, bashkalidhur gjeni relacionin e arsyetuar, të shoqëruar me provat përkatëse”. /tesheshi.com/
