Një autobus me turistë që po udhëtonte prej Novi Pazarit drejt Ulqinit është përfshirë nga flakët gjatë orëve të mesditës së sotshme në afërsi të Beranes,17km larg nga Rozhaja,në Mal të Zi.
Burime zyrtare nga policia malazeze konfirmojnë se nuk ka dëmtime në njerëz. Personat që ndodheshin në autobus kanë mundur të dalin nga automjeti sapo kanë nisur flakët.
Në momentin e zjarrit, autobusi ka qenë i mbushur me udhëtarë që ishin nisur për në Ulqin, për të kaluar aty pushimet. Dyshohet se djegia e mjetit ka ardhur për shkaqe teknike ndërsa pasagjerët pohojnë se flakët janë shfaqur fillimisht në fund të mjetit.
Ekipet e zjarrfikësve të Rozhajës dhe Beranes menjëherë kanë mbërritur në vendngjarje duke bërë të mundur shuarjen e flakëve.
Dëmet materiale të shkaktuara nga kjo ngjarje janë të mëdha, ndërsa policia malazeze ka nisur hetimet për zbardhjen e plotë të rrethanave dhe shkaqeve. /tesheshi.com/
