Mbrëmja e 13 nëntorit ka rezultuar fatale për parizienët, pasi në një seri sulmesh janë vrarë mbi 140 persona. Situata vazhdon të jetë kaotike, ndërsa është shpallur gjendja e jashtëzakonshme.
Mbi 100 njerëz do të vriteshin në sallën e koncerteve të Bataclan-it, e 40 të tjerë rreth e rrotull Parisit.
Presidenti i vendit, Francois Hollande, ndodhej në stadium, ku po ndiqte një takim miqësor në futboll mes Francës dhe Gjermanisë, kur në territorin rrethues të ambientit sportiv u dëgjuan dy shpërthime.
Ndeshja do të vijonte gjer në fund, por mes shikuesve do të përhapej paniku pasi fjalët morën dhenë. Më pas shikuesit do të zbrisnin në fushë, në ankth për atë çka po ngjiste. Televizioni francez TF1 lajmëroi për 35 të vdekur pranë stadiumit.
14 të tjerë u vranë dhe 20 u plagosën kur një person hapi zjarr me kallashikov në një restorant kamboxhian, Le Petit Cambodge.
Njoftohet dhe për vrasjen e një numri të atentatorëve, por nuk jept informacion i mëtejshëm.
Banorëve të Parisit iu kërkua të qëndronin brenda në shtëpi, e ndërkaq policia boshatisi kafenetë e restorantet në qendër të kryeqytetit.
Hollande e quajti “tmerr” atë çka kishte ndodhur teksa iu drejtua vendit nëpërmjet televizionit. Ai deklaroi gjendjen e jashtëzakonshme dhe tha se po mbyllte kufijtë.
Presidenti francez anuloi dhe udhëtimin për në Turqi për mbledhjen e G20-ës.
Parisi është thuajse në gjendje shtetrrethimi këtë mëngjes të së shtunës, me një shtim të dislokimit të 1500 forcave ushtarake. Njëkohësisht janë pezulluar të gjitha lejet për punonjësit e policisë.
I gjithë shërbimi i transportit publik është i pezulluar, përfshirë dhe metronë. /tesheshi.com/
