Shkencëtarja kineze Shi Zhengli nga Instituti i Virologjisë në Wuhan, paralajmëroi se në zonat në Kinën jugore dhe juglindore, popullatat e lakuriqëve të natës mbajnë shtame të tjera të virusit corona që mund të transmetohen tek njerëzit.
Ajo vlerësoi se është e mundur që këto viruse të rrezikshme tashmë po qarkullojnë jashtë kufijve të Kinës, shkruan Guardian.
“Ne duhet t’i kërkojmë këto viruse në vendet e tjera aziatike, jo vetëm në Kinë”, tha Shi, e cila njihet me pseudonimin “Batwoman” sepse studion koronaviruset e transmetuara nga lakuriqët e natës.
Komentet e saj, të dhëna në një uebinar të organizuar nga akademitë mjekësore dhe veterinare franceze, vijnë përpara hulumtimit për origjinën e epidemisë një vit pas shpërthimit, organizuar nga dy ekipe ndërkombëtare – njëra e koordinuar nga Organizata Botërore e Shëndetësisë dhe tjetra e themeluar nga revista mjekësore Lancet.
Këto përpjekje janë politizuar shumë. SHBA dhe Kina akuzojnë njëra-tjetrën si burim i pandemive, ndërsa lufta e tyre tregtare po “lulëzon”, vende të tjera, si India, janë cituar gjithashtu si burime të mundshme të infeksionit. Në fillim të këtij viti, laboratori i Shi Zhengli u akuzua si burim i një rrjedhje aksidentale të virusit. Por asnjë provë nuk u ofrua për këto akuza dhe Shi i mohoi me forcë ato.
Shi nuk sugjeroi që Kina të përjashtohej nga hetimi, por vetëm që këto hetime të shkonin më tej se Kina, gjë që do të ndodhë, sipas Guardian. /teshesh.com/
