Dy studime të reja hetuan lidhjen midis konsumit të shalqirit dhe përmirësimit të zakoneve të të ngrënit tek fëmijët dhe të rriturit, si dhe ndikimi i lëngut të shalqirit në shëndetin kardio-metabolik, raporton SciTechDaily.
Përveçse ky frut i preferuar është plot shije dhe lëndë ushqyese, kërkimet e reja kanë hedhur më tej dritë mbi rolin e tij në përmirësimin e cilësisë së të ushqyerit dhe shëndetin e zemrës.
Një studim i botuar në revistën Nutrients thotë se shalqiri mund të përmirësojë përthithjen e lëndëve ushqyese dhe cilësinë e përgjithshme ushqyese tek fëmijët dhe të rriturit. Ky hulumtim bazohet në analizën e të dhënave dhe zbuloi se cilësia e përgjithshme e dietës ishte dukshëm më e mirë te njerëzit që konsumonin shalqi në krahasim me ata që nuk konsumonin.
Sipas studimit, konsumatorët e shalqirit kishin një konsum më të lartë të fibrave dietike, magnezit, kaliumit, vitaminës C dhe vitaminës A, si dhe likopenit dhe karotenoideve të tjera, dhe një konsum më të ulët të sheqernave të shtuara dhe acideve yndyrore totale të ngopura.
Autorja e studimit Kristen Fulgoni do t’i prezantojë rezultatet në takimin vjetor të Shoqatës Amerikane për Ushqyerjen, që do të mbahet në 22-25 korrik në Boston.
Së bashku me atë studim, u botua një tjetër që bazohet në punën e mëparshme për të treguar se lëngu i shalqirit mbron funksionin vaskular gjatë hiperglicemisë.
Është një provë e kryqëzuar për të testuar efektet e dy javëve të marrjes ditore të lëngut të shalqirit. Në veçanti, u vunë re efektet e mundshme të dobishme të L-citrulline dhe L-arginine, dy përbërës që gjenden në shalqi, në disponueshmërinë biologjike të oksidit nitrik dhe ndryshueshmërinë e rrahjeve të zemrës.
“Megjithëse kampioni ishte i vogël (18 të rinj dhe të reja të shëndetshme) dhe nevojiten më shumë kërkime, kjo i shtohet numrit ekzistues të provave që mbështesin marrjen e rregullt të shalqirit për shëndetin kardio-metabolik. Shalqiri është një burim i pasur me antioksidantë, vitaminë C dhe likopeni, të gjitha këto mund të ndihmojnë në parandalimin e sëmundjeve të zemrës”, tha Dr. Jack Losso i Shkollës së Ushqyerjes dhe Shkencave të Ushqimit të Universitetit Shtetëror të Luizianës.
Udhëzimet dietike për amerikanët rekomandojnë 1,5 deri në 2,5 gota fruta në ditë, por të rriturit dhe fëmijët aktualisht nuk arrijnë këtë qëllim. Ata hanë vetëm gjysmën e sasisë së rekomanduar të frutave çdo ditë.
Përveç përparësive të përmendura tashmë, shalqini është gjithashtu një mënyrë e shkëlqyer për të qëndruar i hidratuar, dhe ka vetëm 80 kalori për dy filxhanë lëng. /tesheshi.com/
