Shkarkimi i Kajmakut, Basha: ky është Rama! Reagim nga PS: kush jemi ne e kush Basha

“Institucionet janë institucione!” – ka qenë kaq komenti i kreut të mazhorancës Edi Rama, pasi shkarkimit të të dytit kryebashkiak të tij, Agim Kajmaku, pasi rezulton, sipas Prokurorisë e më pas KQZ-së, të ketë fshehur një proces penal ndaj tij në Greqi, edhe pse ka dalë i pafajshëm.

Nga ana tjetër, Basha ka qenë më i karrikuar për rastin.

“Agim Kajmaku është fytyra e Edi Ramës, është fytyra e radhës se me kë qeveris ai. Ai nuk qeveris dot pa persona të inkriminuar. Është edhe një poshtërim për shqiptarët që shkëlqejnë kudo në botë por në vend qeverisen nga krimi. Tani janë të gjitha provat se kjo ka qenë një skemë e Edi Ramës për të qeverisë me krimin”, tha kreu demokrat, duke vijuar me kërkesën standarte tashmë:

“Zgjidhja e vetme është që t’ia kthejmë pushtetin popullit, me një qeveri kujdestare, për të shkuar në zgjedhje të parakohshme parlamentare”.

Por zëdhënësja e PS-së Elisa Spiropali, në një reagim të saj i kujtoi Bashës raportin e tij aspak pozitiv me drejtësinë.

“Lulzim! Ti je një i pandehur në prokurori dhe si fillim duhet të provosh pafajësinë tënde për pastrimin e parave në emër të Partisë Demokratike dhe pastaj të hapësh gojën e të japësh mendjen që nuk e ke për Partinë Socialiste!

Partia Socialiste nuk mbron askënd që shkel ligjin dhe nuk mban asnjë përgjegjësi tjetër përveç respektimit të këtij standardi në raport me çdo shkelës, që abuzon me ligjin dhe me besimin e zgjedhësve të saj! Por ty si abuzues kronik i besimit të zgjedhësve të PD nuk ka se si ta rrok mendja këtë standard, prandaj është e kotë të harxhojmë më shumë se disa pak fjalë me ty dhe me shumicat, fitoret e zgjedhjet e tua imagjinare!”, shkroi Spiropali. /tesheshi.com/