Diamanti i kaltër Oppenheimer është shitur në Gjenevë, për çmimin 57.5 milionë dollarë, duke u bërë kështu diamanti më i shtrenjtë i shitur në botë.
20 minuta pas fillimit të ankandit dhe një beteje mes dy blerësve të cilët kanë mbetur anonim, guri jashtëzakonisht i çmuar i vendosur në një unazë me peshë 14.62 karat, është shitur për 50.6 milionë dollar, ndërsa çmimi i përgjithshëm përfshin edhe shpenzimet e provizionit.
Me këtë shitje, është thyer rekordi botëror për një diamant të shitur në ndonjë ankand ndonjëherë.
Siç ka njoftuar AP, diamanti prej 14,62 karat ka tejkaluar vlerësimin e shtëpisë së ankandit Christie’s, e cila kishte pritur një çmim prej 38 deri 45 milion franga.
Me këtë është thyer rekordi i mëhershëm, të cilin e ka mbajtur diamanti “Blue Moon of Josephine”, një diamant 12.03 karat, i cili është shitur për çmimin 48.4 milion dollarë në nëntor të vitit 2015 në Gjenevë.
Diamanti ka ngjyrë blu të gjallë, formë drejtkëndore dhe është i vendosur në unazë, i rrethuar me dy diamante më të vegjël me formë trapezi.
Është pjesë e koleksionit të argjendarit të famshëm londinez i specializuar për diamantet, Sir Philip Oppenheimer, i cili mbikqyr tregun botëror të diamanteve përmes kompanisë De Beers.
Është zbuluar në minierën Premier në Republikën Jug-Afrikane, ku në vitin 1905 ishte gjetur diamanti më i madh në botë, diamanti Cullinan. /tesheshi.com/
