Shtetet e Bashkuara të Amerikës vetëm brenda vitit 2015 u kanë shitur vendeve të Lindjes së Mesme rreth 30 miliardë dollarë armatim dhe pajisje ushtarake.
Siç bën të ditur Politico, Agjencia Amerikane e Bashkëpunimit dhe e Sigurisë së Mbrojtjes (DSCA), Pentagoni e ka kryer një pjesë të mirë të këtyre shitjeve për vendet e Këshillit të Bashkëpunimit të Gjirit, ku bëjnë pjesë Arabia Saudite, Emiratet e Bashkuara Arabe, Katari, Omani, Kuvajti dhe Bahrejni.
Arabia Saudite ndodhet në krye të vendeve që kanë importuar armatime dhe produkte të tjera ushtarake amerikane. Këto importe kapin vlerën e 21 miliardë dollarëve.
Përveç vendeve të Gjirit, shtete të tjera që kanë importuar në sasi të konsiderueshme armatim dhe pajisje ushtarake nga SHBA-të janë dhe Iraku, Izraeli dhe Libani.
Gjatë vitit 2015, Iraku ka blerë armatime dhe pajisje ushtarake me vlerë 2.1 miliardë dollarë. Në këto importe ka produkte të ndryshme, duke filluar nga avionët bombardues F-16 e deri tek produktet më të thjeshta.
Departamenti Amerikan i Shtetit aprovoi në maj të 2015-ës shitjen e armatimeve sulmuese me vlerë 1.9 miliardë dollarë për Izraelin, ndërkohë që Libani në një vit ka blerë produkte ushtarake me vlerë 853 milionë dollarë.
Në opinionin publik në SHBA ka një debat të madh nëse kërkesa në rritje për armatim në Lindjen e Mesme është një nga shkaqet apo rrjedhojat e destabilitetit dhe vorbullës së dhunës në rajon.
Organizata Ndërkombëtare Amnesty International deklaron në raportin e publikuar në fund të vitit të kaluar, me titull “Blerja e stoqeve: Armatimi i ISIS-it”, se pjesa më e madhe e armëve që disponon ISIS-i kanë si origjinë Shtetet e Bashkuara të Amerikës, Rusinë dhe ish-Bashkimin Sovjetik, por mes tyre ka dhe të rrëmbyera nga ushtria irakiane.
Zëdhënësi i Zyrës së Departamentit Amerikan të Shtetit për Marrëdhëniet Politike dhe Ushtarake, David McKeeby, do të thoshte në një dalje publike se është e pashmangshme humbja e armatimit dhe e pajisjeve në fushën e luftës. /tesheshi.com/
