Nga Blendi Gashi
Rreth 1650 persona nga Kosova po kërkohen që nga paslufta e familjarët nuk ua dinë as varret. Pjesa dërrmuese e tyre janë shqiptarë, derisa sipas listave të Serbisë janë më pak se 400 persona nga komuniteti serb dhe nga pakicat e tjera të cilët figurojnë si të pagjetur.
Fajtore kryesore për moszbardhjen e fatit të pagjeturve po shihet politika, konretisht hezitimi i pales serbe për të dhënë leje për të gërmuar në vende ku dyshohet se ka varreza masive.
Se politika është pengesë për zbardhjen e të pagjeturve e ka thënë së fundmi në një konferencë edhe kryetari i Komisionit për persona të pagjetur, Prenk Gjetaj.
“Është koha e fundit që politika të largohet nga çështja e të pagjeturve, në fakt ajo do të duhej të ishte ajo që e zgjidh problemin e jo pengon atë”, ka thënë Gjetaj.
Përveç kësaj brenge, Gjetaj ka dhënë vërejtjet e tij edhe për procesin e mjekësisë ligjore ku fajëson EULEX-in për moskryerjen e punës si duhet, derisa akuzon Ministrinë e Drejtësisë se nuk po merr në duar të veta këtë proces.
Dushi: Deklarimi i Gjetaj i paqëndrueshëm
Akuzat e bëra nga Gjetaj i ka hedhur poshtë Ministria e Drejtësisë duke e quajtur të papranueshëm një deklarim të tillë, dhe sipas tyre për mungesën e rezultateve nuk duhet fajësuar vetëm një organ..
Zv.ministri i Drejtësisë, Florian Dushi, duke mos dashur të paragjykoj kontekstin e as qëllimin e kësaj deklarate, thotë se konstatimi i Gjetajt nuk qëndron, dhe si i tillë është i papranueshëm.
“Instituti i Mjekësisë Ligjore është organ qendror në vartësi të Ministrisë së Drejtësisë e që përmes një bashkëpunimi të shkëlqyer mbështetet nga misioni i EULEX-it në segmente në të cilat Kosovës i mungon ekspertiza por edhe kuadrot, sidomos në fushën e antropologjisë dhe arkeologjisë mjeko-ligjore. Prandaj, nuk mund të bëhet fjalë në këtë rast nëse Ministria e Drejtësisë pranon ose jo të menaxhoj me mjekësinë ligjore!”, thotë zv.ministri Dushi, për tesheshi. com.
Sipas tij, mungesa e rezultateve në fushën e zbardhjes së fatit të personave të zhdukur gjatë luftës, nuk mund t’i atribuohet vetëm një organi që ka përgjegjësi më të kufizuar dhe shumë profesionale në këtë çështje, siç është Instituti i Mjekësisë Ligjore apo misioni i EULEX-it, por duhet të analizohet dhe të vlerësohet saktë, edhe vullneti absolutisht i munguar i palës serbe për bashkëpunim më produktiv në këtë proces, por edhe vetë angazhimi dhe puna e institucioneve tona, duke përfshirë edhe vetë Komisionin Qeveritar për Persona të Zhdukur.
“Prandaj, para se të provojmë që eventualisht të shfajësohemi duke akuzuar pa bazë të tjerët, në këtë rast Ministrinë e Drejtësisë, përkatësisht Institutin e Mjekësisë Ligjore dhe misionin e EULEX-it, ne duhet që në koordinim të plotë, por duke mos ndërhyrë në autorizimet e njëri-tjetrit, me punë të përbashkët dhe akoma më të madhe të provojmë arrijmë rezultatet e synuara nga të gjithë ne në çështjen e zbardhjes së fatit të personave të zhdukur gjatë luftës, çështje e cila vazhdon të shkaktoj dhimbje dhe vuajtje të mëdha për familjet por edhe për shoqërinë tonë në përgjithësi”, thotë Dushi.
Ndryshe, pala kosovare është në pritje që të ipet leje nga Serbia të gërmohen edhe disa lokacione që dyshohet se ka varreza masive siç janë ato në Kizhevak, Jollovishtë, liqeni mbi Rudnicë dhe në Kozarevë të Novi Pazarit. /tesheshi.com/
