Ministrja e Arsimit Evis Kushi qe në shkollën “Çajupi” në Tiranë, ditë pasi aty pati një rast të paprecedent sherri mes një grupi personazh, familjarë të dy mësueseve të atyshme, të cilat u grindën për arsye banale.
Skenat e dhunës u panë të gjitha nga nxënësit, deri në anullim procesi mësimor.
Znj. Kushi është takuar me kolegë të dy mësueseve tashmë të pezulluara, duke thënë se “të gjitha profesionet janë të nderuara, por mësuesi mbetet në çdo kohë e në çdo vend figura më e dashur dhe më e respektuar për të gjithë. Vlerat që ai mbart janë të jashtëzakonshme dhe të pazëvendësueshme në mirëedukimin e fëmijëve tanë”.
“Nisur nga ngjarja e rëndë ku të përfshira ishin dy mësuese të gjimnazit ‘Andon Zako Çajupi’ në Tiranë, dje zhvillova një vizitë pranë kësaj shkolle, e cila ndër vite ka spikatur përherë me talente e rezultate pozitive në çdo fushë.
Pasi i urova fillimisht shumë suksese e mbarësi nxënësve në këtë fillim viti shkollor, bashkëbiseduam gjerësisht me mësuesit për çështje shkollore që kanë nevojë për adresim, për lartësimin më tej të figurës së mësuesit, si dhe forcimin e vazhdueshëm të Komisioneve të Etikës dhe Disiplinës, për të garantuar vetëm mbarëvajtje në proceset e shkollës”, shkruan gruaja që drejton arsimin shqiptar. /tesheshi.com/
