Bashkësia Fetare Islame ka reaguar ndaj akuzave të kryetarit të partisë shqiptare në opozitë, PDSH-së, Menduh Thaçi, i cili në një emision në TV Dukagjinit-Kosovë ka akuzuar drejtëpërdrejtë dhe publikisht këtë institucion, si dhe duke e quajtur kriminel udhëheqësin e tij, reis. Sulejman ef. Rexhepin. Sipas zëdhënësit Agron Vojnika, BFI-ja është institucion apolitik dhe çdokush që pretendon të përfitojë nëpërmjet propagandës mbi të, si pjesë e fushatës politike, duhet të heqië dorë.
“Nuk do t’i japim askujt shkas që të keqpërdorë çfarëdo lloj reagimi të BFI-së për qëllime të kampanjës. BFI është apolitike dhe ashtu do të jetë. Ashtu siç u kemi bërë thirrje të punësuarve në BFI, që të mos përzihen institucionalisht në fushatë, ashtu i ftojmë edhe liderët e partive politike që nëse e kanë patur për qëllim, të heqin dorë dhe të mos e përziejnë BFI-në në fushatën e tyre zgjedhore”, tha Vojnika.
Më herët, Menduh Thaçi deklaroi se PDSH-ja ka bërë gabim në tentativën, për të rregulluar Bashkësinë e Fesë Islame rezultoi se ka vendosur një kriminel dhe hajdut në krye të BFI-së. “PDSH-ja ka bërë edhe gabime. Duke tentuar të rregullojmë Bashkësinë e Fesë Islame, ne vendosëm një kryekriminel, një kryehajdut për kryetar të BFI-së. E them dhe publikish, më fal! Trysnia ishte shumë e madhe e bashkësisë ndërkombëtare, kinse janë futur ekstremistët në BFI dhe ne vepruam. Tani kemi një situatë ku një kryekriminel, bandit, rrugaç i ligës është kryetari i Bashkësisë Fetare Islame. Nuk e ka gjatë edhe ai, sigurisht do të ndryshohet prej asaj pozite dhe atij posti”, u shprehur Menduh Thaçi gjatë emisionit në TV Dukagjini.
Nga Mensur Krasniqi/tesheshi.com
