PD ka shënjestruar kryebashkiakun e radhës socialist për të kaluarën e dyshimtë.
Nr.2 i demokratëve, Sekretari i Përgjithshëm Gazmend Bardhi, i kërkon Prokurorisë së Përgjithshme që të hetojë të kalurën e kryebashkiakut të Mallakastrës Qerim Ismailaj. Kjo pasi opozita ka info se ky i fundit është arrestuar vite më parë në Greqi, e më pas është dëbuar që andej.
“Pyetjeve nëse është ndaluar apo arrestuar ndonjëherë nga organet ligjzbatuese për kryerjen e një vepre penale, nëse është dënuar ndonjëherë nga autoritetet gjyqësore të huaja apo nëse ndaj tij është marrë ndonjëherë masa e dëbimit nga një shtet i huaj, rezulton se i është përgjigjur me JO”, theksohet në shkresën e Bardhit adresuar organit të akuzës.
Më parë, PD denoncoi rastet me kryebashkiakun e Shkodrës e të Vorës, Valdrin Pjetri e Agim Kajmaku, ku i pari u dorëhoq e i dyti është në kërkim. /tesheshi.com/
