Presidenti ukrainas Volodymyr Zelensky tha se forcat ukrainase nuk do të jenë në gjendje të rimarrin kontrollin e Krimesë, duke shtuar se Shtetet e Bashkuara nuk do të kenë nevojë të dërgojnë trupa si pjesë e garancive të sigurisë.
“Është e vërtetë ajo që thotë Donald Trump, presidenti i SHBA-së, se nuk kemi mjaftueshëm armë, jo njerëz, për të rifituar kontrollin e Krimesë”, tha Zelensky.
Ai theksoi se ekziston mundësia e sanksioneve dhe presioneve të tjera ekonomike dhe diplomatike ndaj Rusisë.
Trump po kërkon të arrijë një armëpushim në Ukrainë sa më shpejt të jetë e mundur, ndërsa Kievi dhe aleatët e tij evropianë këmbëngulin që një armëpushim dhe qartësi mbi garancitë e sigurisë për Ukrainën duhet t’i paraprijnë çdo marrëveshjeje që përfshin negociata për territorin, thanë burimet, raporton Al Jazeera.
“Fola me Trump-in për këtë, për ne pika mbrojtëse nuk janë domosdoshmërisht (trupat) në terren. E di që qëndrimi i SHBA-së për këtë nuk është shumë pozitiv – prandaj po flasim për inteligjencën, sigurinë kibernetike dhe raketat Patriot”, tha Zelensky.
Ai gjithashtu theksoi se do të donte të takohej me Trump-in në Vatikan, ku liderët botërorë do të marrin pjesë në funeralin e Papa Françeskut.
“Takime të rëndësishme mund të mbahen në ditët në vijim që mund të sjellin më afër një armëpushim në Ukrainë. Diplomacia duhet të funksionojë dhe ne po bëjmë gjithçka që diplomacia të jetë thelbësore dhe më në fund të funksionojë”, theksoi Zelensky.
Propozimet e SHBA-së për një armëpushim përfshijnë njohjen e aneksimit të Krimesë nga Rusia në vitin 2014 dhe ngrirjen e luftës kryesisht përgjatë vijave ekzistuese të frontit, duke e lënë Rusinë nën kontroll pjesë të Ukrainës lindore dhe jugore, ndërsa Kievi do të duhet të braktisë gjithashtu qëllimin e tij për t’u bashkuar me NATO-n.
Trump tha dje se “Krimea do të mbetet pjesë e Rusisë” dhe i bëri thirrje Ukrainës të nënshkruajë një marrëveshje minerale me SHBA-në sa më shpejt të jetë e mundur.
Gjatë natës së kaluar, luftimet përgjatë vijave të frontit në Ukrainë nuk u ndalën. /tesheshi.com/
