Ka mbi një vit që Zëri i Amerikës është “letra e lakmuesit” të qëndrimit të Uashingtonit mbi politikanë dhe zyrtarë të caktuar shqiptarë.
Mënyra dhe argumentet që përdorin gazetarët e VOA-s në gjuhën shqipe janë kohët e fundit diçka më shumë se pyetje raportimi.
Pra, seç të kujton vitin e largët 1990 apo 1991.
Edhe ambasadori amerikan në Tiranë, Donald Lu nuk ka shkuar deri tani në asnjë studio televizive por vetëm në VOA-n në shqip, ku ka dhënë më shumë se katër intervista.
E tillë ishte edhe intervista me kryrprokurorin Lalla. Gazetarja e vuri në siklet kur nxori që ai nuk ishte në një vizitë zyrtare në Uashington, por kishte shkuar për qëllime private, madje edhe me lekët e veta.
Po pse ndodhi kjo përplasje mes SHBA-së dhe Prokurorit të Përgjithshëm, kur është folur se marrëdhëniet janë të mira dhe madje Lalla kur u zgjodh ka pasur edhe përkrahjen e partnerëve?!
Siç mësohet, gjithçka ndodhi në vjeshtën e këtij viti kur u ç’montua realisht grupi i prokurorëve të trajnuar në SHBA që drejtoheshin dhe koordinoheshin nga Gjon Vucaj, shqiptaro-amerikani që ka mbërritur të ndihmojë Prokurorinë shqiptare.
Llalla, i cili hasi edhe rezistencën e Nishanit, largoi dhe zëvendësoi skuadrën e drejtuar nga Dritan Rreshka, e cila kishte kaluar në sitë 400 dosje korrupsioni në administratë.
Prej këtij fakti, kryeprokurori Adriatik Lalla, doli në publik dhe paralajmëroi arrestime të nivelit të lartë.
Mirëpo në verë, presidenti Bujar Nishani refuzoi të dekretonte emërimin e prokurorëve antikorrupsion dhe në atë çast pritej nga SHBA që të kishte rezistencë nga Llalla.
Pas hezitimit të Nishanit, pati një distancim publik të ambasadorëve të SHBA dhe BE-së ndaj Presidenit.
Por nuk kaloi shumë dhe kreu i Akuzës shqiptare largoi fare grupin e përgatitur për të arrestuar politikanët. Dhe pikërisht këtu nisi ftohja apo përplasja me SHBA, e reflektuar së fundi pra dhe në intervisten e sikletshme në Zërin e Amerikës.
Madje, disa takime të kreut të Prokurorisë me kryetarin e Kuvendit krijuan asocacione lobingu. Më pas Lalla u nis për në SHBA për të marrë pjesë në një takim të shoqatës së juristëve amerikanë.
Por, një ditë pasi kishte shkuar në Uashington, mediat shqiptare botuan lajmin, duke u referuar te organi i Akuzës se kryeprokurori është takuar me zyrtarë të FBI-së dhe DEA-s.
Pas kësaj, erdhi përgënjeshtrimi zyrtar i ambasadës amerikane dhe intervista në VOA që e nxori hapur në publik konfliktin e amerikanëve me Prokurorin e Përgjithshëm dhe faktin që Uashingtoni nuk po e honeps atë, më saktë mënyrën se si ai po punon në krye të Akuzës shqiptare, që sot më shumë se kurrë është në qendër të vëmendjes.
Dhe është ky një zhvillim i ri që paralajmëron një stuhi të pritshme tek ata që iu është besuar pastrimi i politikës nga të qelburit në korrupsion, për t’i vënë me shpatulla për murri nëpërmjet akuzave të detajuara.
Përgatiti: Ermir Hoxha – /tesheshi.com/
