Nga Ylli Pata
Ka tre ditë që politika shqiptare nuk ka një konflikt drastic, siç ndodh rëndom. Po mungojnë akuzat e rënda për trafiqe dhe vrasje, drogë dhe protstitucion etj etj., që janë bërë “supa e përditshme” në televizionet tona.
Kjo ka rastisur pikërisht me “Panama Pappers”, skandalin e madh të fshehjes së parave në kompanitë ofshorë të vendit latinoamerikan.
Dhe, që me “peshkimin” e parë, gazetarët e huaj kanë arritur të zbulojnë një shqiptar, një biznesmen dhe një kompani që ishte regjistruar në Izrael, kishte fituar një koncension gjigand në Shqipëri, por paratë i kishte ruajtur në Panama.
Ka dy ditë që opinion publik shqiptar po merret me një emër: Ismail Mulletin, partnerin e izraelitit Assaf Halkin, i cili, siç bënte të ditur dje tesheshi.com, zotëron kontratën e ngjyrosjes së karburanteve, një biznes që fiton para pa harxhuar asnjë lek.
Por, heshtja e politikës duket se flet shumë për këtë situatë. Flet pasi ekziston frika se do të hapen letra të tjera. Vetëm me përmendjen e një emri u zbuluan aq shumë lidhje.
Po cila është lidhja e Ismail Mulletit?!
Ai ka qenë administrator ligjor i kompanisë më të madhe që bënte kontrabandën e naftës në vitit 1994-1996; në kohën kur Jugosllavia e epokës Millosheviçiane ishte nën embargon e OKB-së dhe ishte Shqipëria ajo që ushqente makinën e saj të luftës në Bosnjë-Hercegovinë.
Kjo pritet të hapë edhe “petë të tjera të lakrorit” të tmerrshëm të superstrukturës shqiptare që të çon tek firmat piramidale dhe më pas në katastrofën e vitit 1997; ku më pas, si për çudi, si kërpudhat pas shiut mbinë dhe pallatet e panumërta që nuk u mor vesh kurrë ku i morën paratë.
Megjithatë, në këtë “shkretëtirë deklaratash” të politikës, ka rënë në sy një prononcim i Petrit Vasilit, krahut të djathtë të Ilir Metës në LSI.
Vasili, tha pak a shumë që më e rëndësishme ishte të hetohen parajsat fiskale në Qipro, Monako, Dubai dhe gjetkë.
Në kohën kur trusti i gazetarëve investigativë tha se këto ditë po hapen letrat e Panamasë për të gjithë vendet e Ballkanit ku Shqipëria është një nga më të të përmendurat, shpërndarja e vëmendjes në fronte të tjerë si Dubai apo Monako, ose mund të shpërqëndrojnë fokusin, ose janë shënjestër e përcaktuar; pra është një deklaratë e koduar që kërkon çkriptim.
Në këtë ditë, ambasadori amerikan takoi Lulzim Bashën, kreun e opozitës, dhe folën për gjysëm ore. Pas këtij takimi asnjë deklaratë. Kryetari i PD-së dha vetëm një njoftim të shkurtër për projektin e sheshit “Skënderbej”; për të cilin foli dhe Edi Rama, kryeministër i vendit, që gjithashtu nuk tha asgjë për skandalin.
Në fakt, një burim zyrtar bëri të ditur se në Departamentin e Pastrimit të Parave po krijohet një dosje me të gjitha të dhënat shqiptare të “Panama Papers”.
Ç’farë po ndodh realisht?! Ka shumë gjasa që, as të enjten e shurmshme të Kuvendit, askush të mos flasë. Të gjithë presin letrat e Ballkanit, më konkretisht Shqipërisë. Të cilat po shkartisen nga 3 gazetarë të njohur në Kroaci. Deri atëherë, duket se do ketë vetëm kode… /tesheshi.com/
