Nga Ermir Hoxha
Eksponentë të PD-së bën këtë të hënë atë që partia e tyre nuk e ka bërë as në ‘91-’92, vite kur reagimi i dhunshëm politik gjithsesi do ishte më i përligjur për shkak të një nervi antikomunist që dominonte jetën publike.
Ndërsa ajo u tregua vërtet e djathtë në vetëpërmbajtje dhe lëvizje politike duke zgjedhur të bëjë opozitë e më pas të vijë në pushtet pa asnjë formë revolucionare me pasoja në krijimin e precedentëve anarkikë, gjë që i jepte legjitimitet pak vite më vonë, në `97-ën, që ta akuzonte opozitën e majtë që po e tentonte pushtetin nëpërmjet anarkisë më ngjyrime të majta – rebelim komunist, siç thoshte ndryshe Berisha – gjë që për hir të së vërtetës ndodhi deri diku.
Ndërsa sot, pas 20 e kusur vitesh, PD-ja ka rrëshqitur në një majtizëm të frikshëm në mënyrën e zgjedhur të reagimit politik, dhe jo thjesht nga fakti se po ndodhet në krah të një grupimi shoqëricivilas që proteston tek Liqeni me këngë-himne komunistësh, pa bërë asnjë përpjekje që së pakku të distancohet nga “kolona zanore” e tyre për të mbetur e papërlyer nga e kuqja e përflakur e një kauze që po jua bën helaq blu-në e kulluar demokratike.
A mos është ky “revolucioni demokratik” për të cilin prej muajsh po përbetohet Berisha?!
Askush deri më sot, asnjë media që e ka marrë në intervistë, atë ose Bashën, nuk iu ka kërkuar të dijnë prej tyre se ç’dreqin një togfjalësh i narrativës së majtë shkon e zë vend tek narrativa e djathtë?! Si duhet kuptuar ky “revolucion”?! Cfarë përfaqson ai në gjykimin e tyre politik, si përkthehet në terren dhe se ç’modeli historik i referohet?!
Po të kishte ndodhur gjetiu që një lider i së djathtës të kishte artikuluar këtë togfjalësh të vokabularit të së majtës, kjo do të përbënte skandal. Bëhet fjalë pra për ato vende e për ato lloj ambientesh politike të cilat kanë profil të qartë politik, e jo një mishmash si tek ne ku “nuk e njeh qeni t’zonë”, prej kaosit në kokat e drejtuesve të politikës.
E në qoftë ky “revolucioni demokratik” i parathënë nga Berisha, pra forma e zgjedhur e reagimit për të kundërshtuar një park lodrash të Erion Velisë, ahere ky është një rast për t’u klasifikuar në historinë e politikës botërore si një parti e djathtë që rrëshqet majtas në funksion të një opozite si qëllim në vetvete, duke shpërfyturuar veten politikish.
Tashmë, para se të ndërtojë një program qeverisës, PD-së i duhet më parë që të restaurojë profilin e saj, të na bëjë të qartë nëse do jetë e djathtë apo e majtë këtej e tutje.
Sa për kujtesë: togfjalëshi “revolucion demokratik” është përdorur për herë të parë në historinë politike shqiptare nga Noli, që siç dihet, me revolucionin e tij antizogist të ‘24-ës, vuri njëherësh dhe themelet e majtizmit shqiptar, ndoshta jo aq i vetëdijshëm për këtë.
Eshtë përdorur nga komunistët gjatë marrjes së pushtetit pas ’44-ës si “revolucion popullor”.
Është përdorur gjithashtu dhe në ’97-ën nga Rexhep Qosja, i cili njihet për frymën e tij majtiste, për të përligjur atë që Berisha e quante “rebelim komunist”.
E tani, ideologjikisht Berisha në një gjatësi vale me Qosen sikur nuk shkon. /tesheshi.com/
