Në ligjërimin e tij me nuanca elektorale, kryeministri Rama ka nisur të aktivizojë dhe një thënie në funksion të diferencës mes grupimit politik që ai udhëheq dhe atij kundërshtar. “’Jeni njësoj’, thonë. Po si mund të jemi njësoj….” dhe më pas vijon renditjen e arritjeve nën qeverisjen e tij, ku për hir të së vërtetës disa qëndrojnë. Bëhet fjalë për ato të aspektit estetik të qyteteve, ku vërtet është bërë diçka.
Por mu këtu, krejt pabesueshëm shfaqet dhe të qënit realisht njësoj të dy kahjeve, të dënuar për të mbetur të njëjtë.
Mjaft të thuhet se kurimi estetik i qendrave të qyteteve, apo Rilindja Urbane siç quhet ndryshe, nuk ka mundur dot të mbjellë sadopak shpresë tek njerëzit se diç po kthen për mirë në këtë vend. Përkundrazi, dëshpërimi social është njolla e hirtë e kësaj qeverie.
Thënë metaforikisht, në shtrimin e çdo pllake, në mbjelljen e çdo peme, është dhe dikush që do po bëhet gati të ikë ose që dëshiron të ikë nga ky vend. Dhe kjo ndodh sepse tek vlerat, tek principet, tek morali nuk ka ndryshuar asgjë e jo tek pllakat. Rama e ka të pamundur të thotë se qeverisja e tij ka qenë më e drejtë me njerëzit, më e ndjeshme; se nga ajo ka buruar më shumë moral; janë promovuar më shumë vlera. Dhe nuk ka si e thotë, pasi kjo është qasja absolutisht e munguar e mendësisë qeverisëse.
Për ta bërë më konkrete: Rama numëron në mënyrë krahasimore lejet e legalizimeve të dhëna në qeverisjen e djeshme dhe këtë të sotmen, por nuk thotë kurrë nëse sot nuk ka korrupsion në dhënien e lejeve. Ai thotë se si është transformuar aksh qendër qyteti, por nuk thotë dot që në krye të njerëzve atje janë vënë më të ndershmit e më të aftët pushtetarë e drejtues.
Harrojeni se do hasni në ligjërimin e Ramës, të pasur me batuta që provokojnë të qeshura por kurrë me postulate që provokojnë mendim, fraza që përshkohen nga meraku për moralin e qeverisjes e të njerëzve që qeverisin, e jo nga ai për cilësinë e pllakave.
Mu pse njerëzit kanë dalluar të qënit njësoj me Rilindjen dhe janë tashmë të bindur për këtë, janë pushtuar nga një zhgënjim dhe dëshpërim i makthshëm. Njësoj, në mungesë morali, kodoshllëk, injorancë, babëzi.
Këtë fundjavë, Rama do ndodhet në jug për të shpërndarë leje legalizimi. Në krah do ketë një drejtor ALUIZNI, i vërtetuar që nuk ka as shkollën e mesme. Së fundi, ky drejtor rilindjeje largoi nga puna dy të shkolluar në Perëndim pasi nuk iu bindën në hedhje firmash atje ku nuk duhet të hidhen.
Jo më kot zhgënjimi i parë nga Rilindja deri në shock, ishte kur njerëzia panë se kujt iu besuan postet drejtuese. Padrejtësitë e Drejtësisë që kërcënohet me reformë, nuk janë asgjë para atyre që prodhohen kur jua beson drejtimin e institucioneve, drejtimin e shtetit, njerëzve hem të paaftë e hem pa moral.
Dhe cfarë u thanë për Rilindjen, vlejnë dhe për Republikën e Re.
Ja pra, pse fatkeqësisht jeni njësoj! /tesheshi.com/
