Manuel Valls do të bëjë një deklaratë në mbrëmje të ditës së sotme, e cila, thotë Reuters, ka të bëjë me shpalljen e kandidaturës për zgjedhjet presidenciale që do të mbahen në Francë në dy raunde në prill e maj të vitit të ardhshëm.
Zgjedhjet paraprake të socialistëve qeverisës do të zhvillohen një muaj më pas, dhe kryeministri francez është parë pandërprerë gjatë këtyre kohëve si kandidat për këto zgjedhje.
Valls bëhet zgjedhja më e mundshme e socialistëve posaçërisht pas deklarimit të presidentit Francois Hollande se nuk do të kërkojë një mandat të dytë.
Një sondazh i kryer mesjavën e shkuar tregoi se ekzistonte pritshmëria dhe dëshira që kryeministri aktual i Francës të garonte për socialistët në zgjedhjet presidenciale.
Te republikanët është mësuar tashmë emri i kandidatit. Ai është Francois Fillon, që po ashtu ka mbajtur të njëjtin post si Valls vite më parë, gjatë qeverisjes së konservatorëve. /tesheshi.com/
