Dy fuqitë e mëdha kanë njoftuar se ndërprerja e luftimeve në Siri do të hyjë në fuqi më 27 shkurt. Marrëveshja e kësaj të hëne nuk i përfshin ISIS-in dhe Frontin en-Nusra, të cilësuara si grupe terroriste nga Këshilli i Sigurimit i OKB-së.
Palët ftohen ta nënshkruajnë marrëveshjen mesditën e 26 shkurtit, e në mesnatë t’i ndërpresin luftimet.
Në fakt, një pajtim për ndërprerjen e luftimeve qe arritur që më 12 shkurt, e ndërsa pritej që të hynte në fuqi brenda një jave, nuk ndodhi diçka e tillë.
Siç njofton BBC-ja, ka patur një komunikim telefonik mes Obamës dhe Putinit me kërkesën e këtij të fundit, e pas bisedës së tyre është lëshuar një deklaratë e përbashkët amerikano-ruse.
Ndërsa armëpushimi vlen, sipas deklaratës, për ato palë në konfliktin sirian që i kanë pranuar kushtet e ndërprerjes së luftimeve dhe kanë treguar angazhim ndaj tyre, nuk do të ndalen sulmet ajrore ndaj grupeve të cilësuar terroriste.
Ndërkaq, avionët luftarakë rusë dhe sirianë do të ndërpresin çdo sulm mbi grupet e armatosura të opozitës.
Gjithsesi, mbizotëron mosbesimi dhe pesimizmi se regjimi i Esadit dhe aleatët e tij do ta ndalojnë ofensivën e tyre. /tesheshi.com/
