Shtetet e Bashkuara dhe Bashkimi Europian alarmohen pas refuzimit të Partisë Demokratike për të dhënë konsensusin për Reformën në Drejtësi, edhe pas rekomandimeve të Komisionit të Venecias.
Ambasadori i SHBA-së, Donald Lu dhe ajo e Bashkimit Europian, Romana Vllahutin kanë mbërritur me urgjencë në Kuvendin e Shqipërisë dhe kanë takuar anëtarët e Komisionit të Reformës.
Një ditë më parë, Partia Demokratike ka bërë të ditur 10 pika të reja që rrëzojnë draftin e Komisionit të Venecias.
Burime diplomatike i thanë tesheshi.com se alarmimi i SHBA-së dhe BE-së është bërë pasi nuk bëhet fjalë vetëm me qëndrimin e PD-së por edhe të LSI-së, përfaqësuesi i së cilës Spartak Braho deklaroi se LSI-ja nuk ishte dakord me rolin që i është dhënë Byrosë Kombëtare të Hetimit në draftin e reformës.
Sot, dy ambasadorët më të rëndësishëm kanë takuar Fatmir Xhafën dhe sipas të gjitha gjasave i kanë dhënë një ultimatum të fundit: të shpallë a është ky parlament i gatshëm ta miratojë Reformën në Drejtësi; dhe nëse jo, vendi të shkojë në zgjedhje të parakohshme.
Minutat e ambasadorëve me kreun e Reformës në Drejtësi kanë qenë të tensionuara dhe siç mësohet, ata janë shprehur se durimi i Uashingtonit dhe Brukselit ka marrë fund. “Duhet ndarë përfundimisht çfarë do të bëhet me reformën, kjo është tallje me durimin tonë”, mësohet të jetë thënë.
Ambasadorët i janë referuar premtimit që PD-ja dhe LSI-ja i kanë bërë Sekretarit të SHBA-së, John Kerry dhe shefes së Diplomacisë së BE-së, Federica Mogherini, të cilët vizituan Tiranën pikërisht për Reformën në Drejtësi. Përgatiti: Ylli Pata – /tesheshi.com/
