Nikolas Cruz, i cili u gjykua për vrasjen e 17 personave në një shkollë të mesme në qytetin amerikan të Parklandit në vitin 2018, u dënua me burgim të përjetshëm, pa mundësi lirimi me kusht.
Verdikti u dha të enjten, pasi 12 anëtarë të jurisë nuk vendosën unanimisht që Cruz të ekzekutohej për krimin që kreu.
Kjo përfundoi gjykimin tre mujor, i cili konsistonte në paraqitjen e argumenteve dhe dëgjimin e dëshmitarëve.
Prokuroria kërkoi dënimin me vdekje, ndërsa mbrojtja argumentoi opsionin e vetëm të mbetur, burgimin e përjetshëm.
Një nga vrasjet masive më vdekjeprurëse
Nikolas Cruz, 24 vjeç, u deklarua fajtor për vrasjen e 14 nxënësve dhe tre mësuesve në shkollën e mesme “Marjory Stoneman Douglas” në Parkland, e cila është gjithashtu një nga të shtënat masive më vdekjeprurëse në shkolla në historinë e SHBA.
Cruz ishte përjashtuar nga shkolla Douglas para se të kryente masakrën.
Në pranimin e fajit, ai tha se i vinte “shumë keq” dhe kërkoi t’i jepej një shans për të ndihmuar të tjerët. /tesheshi.com/
