Ambasada e SHBA-së përmes një deklarate ka mirëpritur konstituimin e Kuvendit dhe formimin e qeverisë, ndërsa uroi kryekuvendarin Kadri Veseli, kryeministrin Ramush Haradinaj, ministrat dhe zyrtarët shtetërorë të sapoemëruar.
Përmes deklaratës, Ambasada e SHBA i përcjell gjithashtu një mesazh të qartë Veselit e Haradinajt se Kosova ka nevojë për qeveri me duar të pastra.
“Ne presim që të punojmë me qeverinë e re për të avancuar progresin e Kosovës për të mirën e gjithë qytetarëve të saj. Shtetet e Bashkuara vazhdojnë të përkrahin Kosovën në shtegun e saj drejtë integrimeve Euro-Atlantike, forcimit të sundimit të ligjit, përmirësimit të zhvillimit ekonomik, dhe normalizimit të marrëdhënieve rajonale.
Qytetarët dëshirojnë institucione shtetërore që punojnë për ta, një qeveri me duar të pastra, dhe një udhëheqësi që ndërmerr veprime vendimtare për të shtyer përpara interesat dhe mirëqenien e Republikës së Kosovës dhe gjithë qytetarëve të saj.
Apelojmë te të gjithë udhëheqësit e Kosovës – në Qeveri dhe në Kuvend, përfshirë partitë opozitare – që të respektojnë votuesit që i zgjodhën duke i marrë këto parime si udhërrëfyes”, përfundon deklarata. /tesheshi.com/
