Ligji i miratuar nga senati italian pak ditë më parë për zhvendosjen e kompanive Call Center në një shtet jo të BE-së, prej së cilës preket edhe Shqipëria, ka sjellë interesimin e politikës shqiptare (LSI-së) për këtë situatë.
Kreu i Grupit Parlamentar të LSI-së, Petrit Vasili priti në takim një përfaqësi të kompanive “Call Center” që operojnë në Shqipëri.
Ai u shpreh se ky biznes realizon punësim masiv dhe se ligji italian ka krijuar vështirësi për të ardhmen e “call center”-ave në vendin tonë. Vasili bëri thirrje që të ndërhyhet shpejt dhe konkretisht nëpërmjet një paketë masash për mbrojtjen e këtij biznesi.
“Aktualisht, janë mijëra të rinj të punësuar në kompanitë ‘call center’. Ligji italian ka krijuar vështirësi për të ardhmen e ‘call center’-ave. Duhet të ndërhyhet shpejt dhe konkretisht. Është e nevojshme një paketë masash. Lehtësirat janë jetike për mbrojtjen e këtij biznesi”, – u shpreh Vasili pas takimit.
Në Shqipëri numërohen mbi 800 kompani call center me mbi 25 mijë të punësuar. Call Center është sektori i katërt më i madh në vend, përsa i përket numrit të të punësuarve./tesheshi.com/
