Nga Blendi Gashi
2016-ta jo vetëm që nuk solli ndonjë kthesë në rrugëtimin e Kosovës drejt Bashkimit Evropian, por për më tepër la pas edhe shumë probleme për politikën kosovare që do ballafaqohet edhe më 2017-të.
Sfidat janë të shumta, por ky vit me të drejtë quhet edhe si vit i Gjykatës Speciale me seli në Hagë (Holandë), e cila është krijuar përkundër kundërshtimeve të mëdha.
Që në janar pritet të ngriten aktakuzat e arrestimet e para para ndaj zyrtarëve të lartë politikë që më pas do pasojnë definitivisht me ndryshime politike.
Emrat e politikanë që do “kapen”, do mësohen në pjesën e parë të këtij viti, ndërsa qeveria e Kosovës ka ndarë 1.5 milionë eurove në buxhetin për mbrojtjen e të akuzuarve.
Figura të shumta të ish UÇK-së kanë deklaruar gjatë vitit të kaluar se nuk i frikësohen kësaj gjykate.
Mbajtja e pushtetit nga qeveria “Mustafa”
Sfida më e madhe për qeverinë aktuale padyshim se do jetë mbetja në pushtet deri në vitin 2018-të, pra të mos çojë vendin në zgjedhje të reja parlamentare.
Kryeministri Mustafa do “luftoi”me çdo mjet që të mos lë karrigen e kryeministrit pasi është mëse i vetëdijshëm se prishja e koalicionit është dhe fundi i tij në politik.
Kreu i LDK-së edhe pse nuk e pranon e di fare mire se rivali i tij më i madh politik, pra Kadri Veseli është duke punuar që moti në heshtje për të bërë kryetar qeverie.
Heqja e vizave
Një sfidë tejet e madhe por e kahmotshme mbetet heqja e vizave, për çka drejtues të shtetit ka mbi shtatë vite që kanë premtuar një gjë të tillë.
Edhe për këtë vit është dhënë një premtim i tillë por që kryekuvendari Kadri Veseli nuk ka siguruar se do ndodh liberalizimi edhe nëse miratohet Demarkacioni me Malin e Zi.
Themelimi i ushtrisë
Transformimi i Forcës së Sigurisë në Forca të Armatosura të Kosovës mbetet një sfidë tjeter e madhe. Ministri i FSK-së Haki Demolli në një intervistë dhënë për tesheshi.com ka dhënë premtimi se ushtria do formohet këtë vit por megjithatë nuk ka dhënë një datë se kur mund të ndodh një gjë e tillë.
Demarkacioni dhe Asociacioni
Ratifikimi i Demarkacionit me Malin e Zi pritet të jetë edhe këtë vit një prej sfidave duke parë se koalicioni qeverisës PDK-LDK-Lista Serbe (kjo e fundit ka bojkotuar punën në institucione) përkundër se përbëjnë shumicën nuk po arrijnë të bëjnë numrat për ta miratuar këtë marrëveshje pasi po kundërshtohen fuqishëm edhe nga disa deputetë të tyre.Lufta kundër krimit e korrupsionit
Betejë tjetër dhe e vazhdueshme mbetet kapja e “peshqve të mëdhenj”, pra vënia para drejtësisë e politikanëve të korruptuar të cilët nga paslufta kanë zhvatur dhe keqpërdorur paranë publike .
Kjo është kërkesë edhe e Bashkimit Evropian që e potencon në raportet e saj të përvitshme të Raport Progresit.
Veriu i Mitrovicës dhe dialogu me Serbinë
Lufta ndaj strukturave ilegale në Mitrovicë mbetet një tjetër problem i madh. Përkundër se janë arritur marrëveshje në Bruksel me Serbinë, kjo pjesë mbetet një “acar” për shtetin, pasi ligjin e bëjnë “ilegalët”.
Moskthimi i shqiptarëve në shtëpitë e tyre në veri tregon më së miri se kjo pjesë mbetet nën tension.
Ndërsa muri ilegal i ngritur nga serbët, tregon se këta të fundit nuk janë interesuar për normalizim mardhëniesh me shtetin tonë.
Po ashtu edhe vazhdimi i dialogut me palën serbe është një ngjarje që pritet të vazhdoj edhe këtë vit, por që “lufta” do bëhet për zbatimin e marrëveshjeve të arritura pasi deri më tani nuk ka ndodhur një gjë e tillë.
Zgjedhjet lokale
Mbajtja e zgjedhjeve lokale në vjeshtë dhe organizimi i tyre mbetet një sfidë tjetër. Partitë politike që në muajt e verë në mos më herët do nisin jo zyrtairsht fushatën zgjedhore ku edhe do prezantoj kandidatët për kryetar.
Padyshim se gara më e rreptë dhe interesimi më i madh do përqendrohet në Prishtinë ku Vetëvendosje do tentoi të mbetet në pushtet (me gjasë Shpend Ahmeti do rikandidoi), ndërsa LDK do mundohet të rikthej kryeqytetin në qeverisjen e saj.
Punësimi…
Ulja e numrit të papunësisë, pra krijimi i vendeve të reja të punës është një sfidë tjetër me të cilën do ballafaqohet shteti.
Jo pak qytetarë në vazhdimësi po ikin nga shteti për një jetë më të mirë në vendet perëndimore, andaj qeveria e ka obligim që qytetarëve t’iu siguroi mirëqenie më të mirë. /tesheshi.com/
