Nga Blendi Gashi
Institucionet më të larta udhëheqëse të Kosovës, janë zotuar se nuk do të lejojnë mbajtjen e zgjedhjeve parlamentare të Serbisë në territorin e Kosovës; por nga ana tjetër, nuk do t’ua mohojë të drejtën qytetarëve serbë që kanë dyshtetësi që ta ushtrojnë të drejtën e tyre të votes përmes zyrën ndërlidhëse.
Ministrja për dialog Edita Tahiri, ka thënë se zgjedhjet serbe nuk do të mbahen në Kosovë, pasi Kosova është shtet i pavarur e sovran dhe nuk lejon në vendin e vet mbajtjen e zgjedhjeve të një shteti të huaj.
Tahiri ka theksuar se koha kur Serbia mbante zgjedhje në Kosovë ka kaluar. Paralajmërimet e zyrtarëve të Serbisë, ajo i ka quajtur propagandë e brendshme e tyre dhe se kjo nuk vjen në konsideratë.
Por, shefi i të ashtuquajturës Zyrë për Kosovën në Qeverinë e Serbisë, Marko Gjuriq, i është kundërpërgjigjur Tahirit duke thënë se zgjedhjet serbe do të mbahen në Kosovë ashtu siç janë mbajtur edhe vitet e kaluara.
“Tahiri vetëm mund të vendosë nëse vetë do të marrë pjesë ose jo në zgjedhje, sikur dhe çdo qytetar tjerë që vendos për të votuar ose jo, por është krejtësisht e sigurt se këto zgjedhje do të mbahen në gjithë territorin e vendit”, ka deklaruar Gjuriq.
Analistët politik thonë se nuk duhet të lejohen të hapen qendra votimi në shtetin tonë, por vetëm t’iu mundësohet qytetarëve serbë që kanë dy shtetësi të votojnë përmes zyrës ndërlidhëse.
Ata shprehin brengën e tyre se Serbia sërish do t’ia arrijë qëllimit të tyre dhe zotimet e qeverisë kosovare do të mbesin vetëm të tilla.
Analisti politik Nexhmedin Spahiu, thotë se me qeverinë aktuale që ka Kosova mund të ndodhë që edhe të realizohet synimi i Beogradit, hapja e qendra të votimit në Kosovë, por një gjë të tillë thotë se nuk duhet lejuar.
“Qytetarëve të Kosovës u është lejuar dyshtetësia, kështu që gjithë atë që kanë mbajtur shtetësinë serbe kanë të drejtë të votojnë. por çështja shtrohet si e ku. Serbët kanë përfaqësuesin e tyre diplomatik në Prishtinë, Nenad Paviçeviq, dhe procesi i votimit duhet të kryhet përmes zyrës së tij.
Qeveria nuk duhet të lejojë zgjedhje serbe në Kosovë përveç përmes zyrës ndërlidhëse. Megjithatë, me këtë qeveri aktuale gjithçka mund të ndodh”, ka thënë Spahiu për tesheshi.com.
Njohësi i rrethanave politike në vend, Faik Krasniqi thotë se qeveria e Kosovës jep deklarata se nuk do të lejojë që Serbia të organizojë zgedhjet parlamentare edhe në Kosovë, por gjithmonë ndodh e kundërta.
Krasniqi, në prononcim për tesheshi.com thotë se Serbia gjithmonë ia arrin qëllimit dhe organizon zgedhjet e tyre parlamentare edhe në territorin e Republikës së Kosovë.
“Prandaj, nuk iu besoj aspak deklaratave të zyrtarëve kosovarë lidhur me këtë çështje, sepse edhe kësaj radhe qeveria e Serbisë do t’i organizojë zgjedhjet parlamentare, ashtu siç ka bërë edhe në të kaluarën, e jo siç japin deklarata zyrtarët tanë se qytetarët serbë me dy shtetësi do të mund të votojnë vetëm përmes zyrës ndërlidhëse. Kjo tregon që Serbia akoma ka ndikim në Kosovë, pavarësisht që prej 17 shkurtit 2008, kemi shpallur pavarësinë”, shprehet Krasniqi.
Serbia me përkrahjen e OSBE-së në vitin 2014 pati hapur 10 qendra të votimit në Kosovë dhe të drejtën e votës e kanë pasur 107,958 serbë të Kosovës. /tesheshi.com/
