Skuadra e drejtuar nga Unai Emery është finaliste e Kupës së Mbretit në Spanjë pas barazimit të mbrëmshëm ndaj Selta Vigos.
Me ndeshjen e parë të fituar 4-0, Sevilja thuajse ishte me një këmbë në finale, por hasi vështirësi ndërsa Selta Vigo i provoi të gjitha mundësitë në takimin në fushën e vet.
2-2 përfundoi përballja mes Selta Vigos dhe Seviljes në “Estadio de Balaidos”.
Vendasit e panë veten në epërsi të dyfishtë në minutën e 55-të pas dy golave të Iago Aspas-it, dhe nisën të ëndërrojnë për një përmbysje të madhe.
Vetëm dy minuta më pas, Banega i Seviljes do t’i shkurajonte teksa do të ngushtonte rezultatin. Goli i dytë i miqve u shënua nga Konoplyanka tre minuta para mbarimit të lojës.
Seviljen e pret një kundërshtar thuajse i pakalueshëm në finale. Trofeu i Kupës së Mbretit do të diskutohet mes saj dhe Barcelonës në finalen e 21 majit. /tesheshi.com/
