Grupi politik kryesor në Bashkimin Evropian, Partia Popullore Evropiane (EPP), ka mbështetur Presidenten e Komisionit Evropian, Ursula von der Leyen, për mandatin e saj të dytë në atë post, raporton Reuters.
Përfaqësuesit e PPE votuan në kongresin e Bukureshtit me 400 vota pro dhe 89 kundër dhe me shumicë absolute mbështetën von der Leyen në kandidaturën e saj edhe për pesë vite të tjera në një nga postet më të larta në BE, që do vendoset pas zgjedhjeve parlamentare në Union në qershor.
Von der Leyen, edhe pse e vetmja kandidate në listën e EPP-së, kishte nevojë për një shumicë absolute për të fituar, ku ajo përmendi luftërat në Ukrainë dhe Gaza si sfida kryesore për BE-në, si dhe forcimin e Kinës, sipas Reuters.
Presidentja e Komisionit Evropian njoftoi gjatë takimit të partisë në Bukuresht se miqtë e presidentit rus Vladimir Putin po përpiqen të rishkruajnë historinë evropiane dhe të vjedhin të ardhmen e saj, duke “përhapur urrejtje përmes tastierave”.
“Evropa jonë paqësore dhe e lirë po përballet me sfida të paprecedentë nga populistët, nacionalistët dhe demagogët që duan të shkatërrojnë vlerat tona dhe Evropën”, tha ajo.
Ajo ka premtuar të përmirësojë ekonominë e Evropës, të frenojë kontrabandën e emigrantëve të paligjshëm në bllok, të rrisë konkurrencën dhe të mbështesë fermerët ndërsa kostoja e jetesës rritet, si dhe më shumë ndihmë financiare dhe ushtarake për Ukrainën, raporton Reuters.
Pengesa më e madhe për von der Leyen për të fituar një mandat të dytë, sipas Reuters, mund të jenë euroskeptikët, të cilët pritet të fitojnë më shumë vende, gjë që mund ta detyrojë presidenten gjermane të kërkojë mbështetje jashtë partive tradicionale centriste, potencialisht me koston e disa lëshimeve politike. /tesheshi.com/
