E vetmja gjë e re nga takimi i dytë mes Ramës dhe Bashës në Presidencë, është rënia e vettingut. Kjo fjalë, e cila sipas gjykimit të kryeministrit përbën dhe shkakun kryesor të çadrës e jo zgjedhjet, nuk është përmendur fare në prononcimet e rastit pas daljes nga zyra e Nishanit.
Rama u përqëndrua vetëm tek propozimet e tij të bëra një ditë më parë, ku përfshihet dhe një z/kryeministër propozuar nga opozita, me qëllim kontrollin mbi zgjedhjet.
“Oferta që unë i kam bërë PD-së, është ajo e ditura për të ndërtuar një mekanizëm monitorimi të zgjedhjeve ku PD-ja të ketë të dy sytë në proces nga brenda qeverisë me një zv/kryeministër të propozohet nga Partia Demokratike, po të vijë jo nga radhët e PD-së dhe së bashku me 3 përfaqësues, të SHBA-ve, të BE dhe OSBE të krijojë një task-force për të siguruar që shteti dhe asetet shtetërore nuk keqpërdoren për fushatë elektorale. Tre zv/ministra të propozuar nga PD-ja, por jo nga radhët e saj, të vendosen në Ministrinë e Brendshme, në Ministrinë e Drejtësisë dhe Ministrinë e Arsimit”, tha Rama.
Ndërsa Basha nga ana e tij, i cili siç u kuptua, ka kërkuar dhe 6 muaj shtyerje zgjedhjesh, nuk i është bindur ofertës së ofruar nga kryeministri.
“Propozimet e ofruara të cilat më ishin bërë të ditura dy javë më parë afër kryeministrit, pra me siguri propozime të lobuara nga kryeministri nuk ofronin zgjidhjen politike. 4 ministra teknikë të propozuar nga kryeministri me aprovimin e opozitës, në kushtet kur kryeministri ka akaparuar parti të tëra opozitare, deputetë të opozitës madje dhe deputetë të koalicioni të tij si manovra politike për të realizuar synimet e tij politike nuk ofrojnë asgjë, asnjë garanci”, tha kreu demokrat. /tesheshi.com/
