Ka surprizuar njeriu që nga një pjesë e opinionit (keq)gjykohet si një mbetje e komunizmit në demokraci, Gramoz Ruçi.
Edhe pse i mbetur në hije gjatë gjithë kësaj periudhe të trazuar, ku pra nuk ka patur një protagonizëm të theksuar, Ruçi ka qenë prej atyre që mëngjesin e kësaj të diele ka përcjellë mesazhin më sinjifikativ, atë që “nuk ka burrë nëne që të vendos diktaturën në Shqipëri”.
Duke qenë ndër të parët që ka votuar nga mazhoranca, në një palë zgjedhje të bojkotuara nga PD-LSI si pjesë e një aksioni politik edhe me diegie mandatesh, me qëllim rrëzimin e Ramës, enë fund pa ia dalë dot pas muajsh përpjekjeje, Ruçi ka tentuar t’u kthejë përgjigje atyre zërave që e lidhin këtë ditë me kthimin e dikaturës, duke u nisur pra nga fakti i mungesës së opozitës potente.
“Siç e patë unë jo vetëm që votova por edhe zgjodha. Besoj se nuk keni dyshim për kë kam votuar. Zgjodha sepse kemi dy kandidatë. Do ishte shumë mirë të kishim më shumë kandidatë në 61 bashkitë. Sot nuk është dita të analizojmë këtë çështje. Sot është dita të bëjmë apel për qetësi, maturi dhe vendosmëri që do të thotë procesi të jetë i qetë, të marrim pjesë dhe vendosmëri për të vazhduar reformat e vendit. Do shpresoj dhe besoj që klasa politike shqiptare që nga dita e hënë, as ata që vendosën të mos marrin pjesë në zgjedhje dhe as mazhoranca, të mos zhvendosen nga ajo që ka më shumë rëndësi”, tha njeriu që drejton Kuvendin e Shqipërisë, duke konkluduar në fund: “Nuk ka burrë nëne që të vendosë diktaturën, veçanërisht në Shqipëri”.
Siç dihet, vetëm në 30 bashki votohet vetëm me një kandidat, ndërsa në 31 të tjera, loja demokratike funksionon, pra qoftë dhe formalisht, pasi ka dy ose me shumë kandidatë. /tesheshi.com/
