Pak ditë pasi Serbia ndaloi hyrjen e ministrit të Jashtëm Behgjet Pacolli në territorin e saj, këtë e ka bërë edhe ndaj ish-kryetarit të Akademisë së Shkencave dhe të Arteve të Kosovës (ASHAK), njëherësh anëtarit të Akademisë Evropiane të Shkencave dhe të Arteve, Hivzi Islami. Ky i fundit nuk është lejuar nga policia kufitare e Serbisë të shkojë në Preshevë tek familja e tij dhe kjo për herë të dytë brenda pak ditësh.
“Islami ishte nisur me familjen për vizitë te familjarët e tij në Preshevë. Familjarët e tjerë që udhëtonin bashkë me të u lejuan ta kalonin kufirin, ndërsa ai jo pa marrë shpjegime nga policia kufitare serbe”, thuhet në njoftimin e ASHAK-ut.
ASHAK thotë se deri sot, Islami ka udhëtuar në Preshevë e Bujanovc sa herë ka pasur arsye apo dëshirë pa asnjë problem.
Ai është i lindur në Letovicë të Bujanovcit, ndërsa familjarët e tij të afërt jetojnë në Letovicë, në Bujanovc dhe Preshevë.
Ndaj ndalimit që i është bë akademikut Islami ka reaguar edhe Jetlir Zyberaj, këshilltari i ministrit të Pacolli.
“Sot, për herë të dytë përsëriti ndalimin e akademikut Hivzi Islami në piken kufitare me Serbinë. Zyrtarët e Kosovës dhe qytetarët tanë në vazhdimësi përballen me gjëra të tilla. BE do të lajmërohet nga ana jonë që reciprociteti nga ana e Kosovës është mundësi reale tani”, shkruan Zyberaj në Facebook. /tesheshi.com/
