Nga Musa Mustafa
“Serbia po bën të gjitha përpjekjet për të penguar hapjen e varrezave masive me shqiptarë që gjenden në territorin e saj, ndërkohë që për varrezat masive që janë në Kosovë, vendet se ku gjenden dihen, por që dikush nuk po dëshiron t’i hapë.”
Kështu ka deklaruar Bajram Qerkinaj, kryetar i Këshilli Kombëtar e njëherësh anëtar i Komisionit Qeveritar për persona të pagjetur.
“Ne jemi të shqetësuar, sepse punët përgatitore për hulumtimin e varrezave masive nga ana e Serbisë ka ngecur me qëllim”, ka thënë Qerkinaj,
Sipas tij, Komisioni Qeveritar i Kosovës ka bërë përgatitje dhe planin për hulumtimin e vendeve ku dyshohet të jenë varrosur shqiptarë e të vrarë gjatë luftës në Kosovës – pra bëhet fjalë për varreza që gjenden në territorin e Serbisë – por që Komisioni Qeveritar serb nuk ka paraqitur asnjë plan konkret rreth këtij procesi hulumtimi.
“Vitin e kaluar, kur janë ndërprerë hulumtimet në vendet ku dyshohet për varreza masive për shkak të përkeqësimit të motit, jemi marrë vesh që sapo koha të përmirësohet koha menjëherë të fillojmë me gërmime në këto vende, por Komisioni i Serbisë deri më tani nuk ka sjell asnjë plan veprimi”, thekson Qerkinaj.
Dhe ai mendon se Komisioni Qeveritar i Serbisë është duke u përpjekur që me mënyra të ndryshme t’i shmanget i gjetjes së viktimave, edhe pse siç thotë Qerkinaj, serbët fort mirë e dijnë, pasi i kanë informacionet se ku janë shqiptarë e varrosur dhe kush janë personat që i kanë transportuar këto kufoma nga Kosova në Serbi.
“Varrezat që janë hulumtuar deri më tani si ajo e Rudnicës, e Kozares në Novi Pazar dhe e Krizhevacit në Rashkë, edhe pse janë hulumtuar kanë mbetur për gjysmë pasi që dyshohet se ende në këto lokacione gjenden kufoma të shqiptarëve, por që pala serbe po pengon në kryerjen e punimeve” ka thënë Qerkinaj.
Ndërkohë, portali tesheshi.com, ka siguruar dy dokumente të cilat tregojnë për varreza masive në të dy anët e varrezave të shqiptarëve në Mitrovicë, në themelet e Xhamisë së Ibrit, si dhe në fshatin Kalludër e vogël të komunës së Zubin Potokut.
Lidhur me këto, Bajram Qerkinaj i ka tha portalit tesheshi.com, se “nuk po e di se pse këto varreza që janë në territorin e Kosovës nuk po hapen për hulumtim?! Këtu mundet me qenë vetëm problemi politik.”
“Po, në Kalluder dihen se sa shqiptare janë të varrosur si dhe lokacioni i saktë, por ende nuk ka asnjë veprim. Po ashtu edhe në varrezat e qytetit në veri, dihen personat me emër e mbiemër që janë vrarë e varrosur nga serbët, e gjithashtu dyshohet se në xhaminë e rrënuar në veri të Mitrovicës tek ura, dyshohet për varreza masive, por veprime nuk ka”, ka sqaruar Qerkinaj.
Ai kritikon institucionet e Kosovës se janë duke bërë shumë pak për të vrarët dhe të zhdukurit. e sidomos në ngritjen e akuzave ndaj personave që kanë kryer krime.
Sipas tij, Instituti për Hulumtimin e Krimeve të luftës në Kosovës që është themeluar menjëherë pas shpalljes së Pavarësisë së Kosovës, deri më tani, me përjashtim të disa librave të cilat kanë evidentuar të vrarët, nuk ka ngritur asnjë kallzim penal ndaj autorëve të vrasjes së shqiptarëve; e po ashtu edhe Prokuroria e Kosovës për këtë çështje është duke heshtur. /tesheshi.com/
