Presidentët e Kinës dhe Serbisë kanë zhvilluar një ceremoni në Beograd, ku kanë dënuar NATO-n për sulmin e bërë 17 vjet më parë mbi ambasadën e Pekinit në kryeqytetin serb.
Bombardimi i ambasadës kineze në atë kohë u quajt “gabim shënjestre” nga Aleanca e Atlantikut Verior, por zëra të brendshëm thanë se selia diplomatike e Pekinit ishte kthyer në qendrën e komandimit operacional të sulmeve serbe në Kosovë.
Ishte koha kur NATO bombardoi të gjithë caqet ushtarake të Millosheviçit, me qëllim çlirimin e Kosovës.
Kanë kaluar 17 vjet prej atij sulmi dhe me gjithë përplasjet mes Kinës dhe SHBA-së, incidenti duket se u kalua.
Por “vënia e gishtit në plagë” sot nga presidenti i Kinës në Serbi, me një ceremoni të bujshme dhe shumë zhurmë, tregon se kemi të bëjmë me një akt politik të qartë dhe demonstrues ndaj NATO-s.
Dhe gjithçka bëhet në një kohë kur kryeministri serb, Aleksandër Vuçiç është angazhuar për integrim në strukturat euroatlantike.
Presidenti kinez ka nisur që prej ditës së djeshme një vizitë tre ditore në Serbi, e cila ka eklipsuar çdo zhvillim në këtë vend.
Presidenti kinez, Li Xiping dhe homologu i tij serb, Tomislav Nikoliç, kanë nderuar 3 diplomatët kinezë që humbën jetën gjatë bombardimit të NATO-s.
Siç bën të ditur “B92”, ceremonia që u zhvillua për të përkujtuar sulmin e NATO-s ishte madhështore.
Përveç presidentëve dhe bashkëshorteve, merrnin pjesë Kryeministri Vuçiç dhe ministrat,
Guvernatorja e Bankës Qendrore të Serbisë, Jorgovanka Tabakoviç, të cilët mbanin në duar krizantemën e bardhë, simbolin e zisë në Kinë.
Pas kësaj ceremonie, dy presidentët vunë gurin e themelit në Qendrën Kulturore të Kinës, “Konfuci”, që do të ndërtohet në Beograd.
Një rrugë mori emrin e Konfucit dhe një tjetër do të quhet “Rruga e Miqësisë Kinë-Serbi”.
Guri i themelit u vendos pikërisht në vendin ku ndodhej ambasada kineze që u shkatërrua në 1999 nga sulmi i NATO-s.
Ministri i Kulturës së Kinës, Luo Shugang, tha se të dy vendet kanë një traditë të gjatë miqësie dhe kulturë të pasur.
Bashkëpunimi bëhet mbi bazën e strategjisë së Kinës për të ringjallur Rrugën e Mëndafshit, në një mënyrë të re të zhvillimit ekonomik dhe tregtisë.
Ndërkaq, sot presidenti kinez Xi vizitoi kombinatin metalurgjik Zelezara Smederevo steel që është blerë nga kinezët./tesheshi.com/
