Toni Iwobi, me origjinë nga Nigeria, thotë se partia e së djathtës ekstreme nuk ka probleme me “emigracionin e ligjshëm”. Ndoshta një zgjedhje propagandistike, apo tregues i ndryshimeve, nigeriani është senatori i parë më ngjyrë në historinë e Italisë.
Senatori i parë me ngjyrë i Italisë, një nga fenomenet e shumta që nxorrën në pah zgjedhjet e fundit parlamentare në këtë vend, ka deklaruar se zgjedhja e tij në logon e Ligës, dëshmon se partia e së djathtës ekstreme, retorika kundër-emigrantëve e së cilës e ndihmoi të merrte rezultatin e vet më të mirë në 4 mars, nuk ka asnjë problem me emigracionin e ligjshëm.
Pasi fushatoi nën slloganin e partisë “ndal pushtimit”, biznesmeni 62-vjeçar Toni Iwobi, me origjinë nga Nigeria, fitoi vendin e tij në Senat nga Spirano, një qytet i vogël në Lombardi, pasi partia mori më shumë se 18 për qind të votave në rang kombëtar.
“Eshtë një nder i pabesueshëm për mua që të jem senatori i parë me ngjyrë i Italisë”, tha ai për “The Guardian”.
Ai e ndau suksesin në rajon me kolegun e partisë, Attilio Fontana, guvernatorin e ri të Lombardisë, i cili në nisje të fushatës së zgjedhjeve kishte thënë se fluksi emigrator në Itali rrezikonte “të zhdukte rracën tonë të bardhë”.
Iwobi, i cili është pronar i një kompanie IT-je, erdhi në Itali në fund të viteve 1970 për të studiuar në Peruxhia. Ai më pas u zhvendos në Spirano, ku thotë se gjeti dy dashuritë e jetës së tij: gruan e tij italiane dhe Ligën, në atë kohë të njohur si Liga e Veriut. Ai u bë këshilltar bashkiak nga kjo parti në vitin 1995.
Iwobi, i cili është katolik, argumenton se njerëzit duhet të udhëtojnë në Itali në mënyrë të ligjshme, ashtu si bëri ai. “Unë erdha me një vizë studenti”, thotë ai. “Gjatë asaj periudhe mbi 40 vjet më parë, të vije në Itali kërkonte vizë. Partia ime po lufton për të rikthyer emigracionin e ligjshëm”.
Liga doli forca më e fuqishme brenda koalicionit të djathtë prej tre partish, që fitoi pjesën më të madhe të votave në zgjedhje por që nuk arriti dot shumicën prej 40 për qind që nevojitet për të qeverisur. Negociatat midis partive tashmë kanë nisur për të dalë me një qeverisje koalicioni.
Iwobi ka luajtur një rol instrumental në arritjen e suksesit të Ligës, pasi ka ndihmuar në hartimin e disa prej politikave kyçe të partisë, që kur u caktua nga lideri i saj, Matteo Salvini, në krye të komitetit të Emigracionit dhe Sigurisë në vitin 2015.
Synimet e partisë përfshijnë edhe lehtësimin e procedurave për deportimin e emigrantëve, që hyjnë në vend në mënyrë të paligjshme, refuzimin e pranimit për ata që nuk kanë dokumente e që mbërrijnë me anijet e shpëtimit të organizatave të ndihmës, si dhe zhvillimin e projekteve të gjera ekonomike nga ana e BE-së për vendet e origjinës si mënyrë për të ndalur fluksin e njerëzve.
“Emërimi që Salvini më bëri për emigracionin tregon se ai e di me saktësi se çfarë është duke bërë”, thotë senatori.
Ashtu si Salvini, i cili ka apeluar për “pastrim masiv” që Italia të heqë qafe njerëzit e paligjshëm në vend, Iwobi synon 600 mijë nga emigrantët që kanë zbarkuar në brigjet jugore të Italisë, kjo brenda katër vjetësh. Numri më i madh i kërkesave për azil në Itali vjen nga nigerianët.
“Secili nga ata që arratoset prej një vendi për shkak të konflikteve dhe luftës duhet strehuar”, thotë Iwobi. “Por, të gjithë ata që e lënë vendin e tyre për arsyet e gabuara dhe ata që udhëtojnë në rrugën e gabuar duhen ndalur. Emigracioni nuk duhet të marrë mijëra jetë në det dhe as duhet të kushtojë edhe qoftë një cent për vendin mikpritës”, thotë ai.
“Dëshiroj të theksoj se Liga nuk shenjëstron kundër emigracionit si të tillë, është në ADN humane. Por ne jemi kundër emigracionit të paligjshëm”.
Pikëpamjet e Iwobi-t bien në kundërshti me ato të Cécile Kyenge, e cila u bë ministrja e parë me ngjyrë e Italisë, në dhomën e Ulët të parlamentit, në vitin 2013, dhe që më pas shërbeu si ministre e Integrimit në qeverinë e Enriko Letës.
Kyenge pësoi sulme raciste nga nivele të larta gjatë mbajtjes së shkurtër të postit, përfshirë dhe hedhjen e bananeve mbi të dhe talljen duke e përngjasuar me një orangutang nga senatori i Ligës, Roberto Calderoli. Iwobi kritikon politikat e saj për pritjen e emigrantëve, duke thënë se ata mund t’i ndihmojnë “që në shtëpinë e tyre”. Ai po ashtu kundërshton një ligj të draftuar nga Kyenge që do t’u jepte rrugë më të shkurtër drejt shtetësisë, fëmijëve të lindur në Itali nga prindër të huaj.
Por, ai këmbëngul se partia nuk është raciste dhe apelon të huajt të shqetësuar për valën më të fundit të sulmeve rraciste, të ruajnë qetësinë.
“Politikat tona synojnë të sjellin paqen dhe rregullin për kombin”.
Përgatiti: Juli Prifti – /tesheshi.com/
