Të premten, qeveria italiane urdhëroi sekuestrimin e një jahti me vlerë rreth 700 milionë dollar, gati 140 metra i gjatë, i cili trajtohet në media si i lidhur me presidentin rus Vladimir Putin.
“Scheherazade”-ja elegante është duke u riparuar në portin italian të Marina di Carrara që nga shtatori, por aktivitetet e fundit në port sugjerojnë se ekuipazhi mund të përgatitet për të dalë në det, raportoi BBC.
Ministria italiane e Financave tha në një deklaratë se hetimet tregojnë se pronari i anijes kishte lidhje me “elementë të shquar të qeverisë ruse” dhe me njerëz të shënjestruar nga sanksionet e Bashkimit Evropian.
Ish-anëtari i ekuipazhit tha se ndërsa ai ishte duke punuar në “Scheherazade”, u fol se Putin ishte pronari i jahtit.
Zyrtarët amerikanë thanë në mars se superjahti mund t’i përkiste presidentit rus.
Scheherazade ka dy platforma uljeje helikopterësh dhe mund të strehojë deri në 18 të ftuar dhe 40 anëtarë të ekuipazhit.
Ministria italiane e Financave nuk e përmendi emrin e pronarit, por tha se i kishte kërkuar Bashkimit Evropian që të shtonte personin në listën e sanksioneve dhe urdhëroi sekuestrimin e jahtit deri në marrjen e një vendimi përfundimtar. /tesheshi.com/
