Megjithëse nuk thuhet, duket se ka një arritje thelbësore në negociatat dyditore të Kretës mes ministrit të Jashtëm grek, Nikos Kotzias dhe shefit të diplomacisë shqiptare, Ditmir Bushati.
Athina është tërhequr përfundimisht nga varianti i rrëzuar nga Gjykata Kushtetuese dhe Shqipëria merr kontroll të plotë të pjesës së saj të Kanalit të Korfuzit, duke përfituar 200 kilometra katror hapësirë detare dhe nëndetare .
Më konkretisht, shkëmbi Barketa nuk do të jetë më si kufi bregdetarëi Greqisë, që do të thotë se e humb rëndësinë që ka pasur në marrëveshjen e mëparshme që i jepte territor vendit fqinj.
Marrëveshja mes dy palëve është: kufiri detar është vija mesore mes dy vendeve dhe kjo caktohet fare lehtë duke marrë si bazë brigjet.
Ndërkohë, në rastet që shkëmbinjtë nënujore kanë pjesë edhe në anën tjetër, do të përdoret po ajo metodë e njohur edhe në të drejtën ndërkombëtare.
Parimi i zgjidhjes së drejtë apo equitable solution, i konsideron si të rëndësishëm vetëm ishujt e banuar, në funksion të përkufizimit të kufijve detarë, përkatësisht shelfit kontinental.
Me ndarjen e re, bregdeti i Himarës do të ketë 12 milje detare si det territorial të Shqipërisë, ndërsa ishulli Othonoi 6 milje. Nëpërmjet zbatimit të kombinuar të këtyre parimeve (parimit të vijës së mesme dhe atij të equitable solution), Shqipërisë i rikthehen mbi 200 kilometra katrorë të humbur me marrëveshjen e vjetër.
Me këtë zgjidhje kanë fituar të dy palët, por më shumë ka fituar Greqia, pasi ajo nis të ndajë detin dhe pritet të kërkojë të njëjtën marrëveshje edhe me Turqinë, Egjiptin dhe Libinë.
Në muajin dhjetor, Athina po përgatitet për një zhvillim shumë të rëndësishëm politik, siç është vizita e Presidentit të Turqisë, Rexhep Tajip Erdogan, që krerët grekë duan ta organizojnë në mënyrë “perfekte”.
Tsipras shpreson që të marrë nga Erdogan “Ok” për një zgjidhje të kufirit detar, si dhe një ndërmjetësim të Ankarasë për çështjen e Maqedonisë.
Siç mësohet, negociatat edhe pse janë zhvilluar dyshe, ata prapa kanë pasur në çdo hap SHBA-në, e cila që në shtator ka hyrë fuqishëm në Ballkan për të zgjidhur një e nga një të gjitha çështjet, duke e mbajtur larg influencën e Moskës.
Presidenti Trump e ka takuar në dy raste kryeministrin grek Tsipras, një herë në Bruksel dhe një herë në Uashington, ku mësohet ka folur që Athina të mbyllë përfundimisht problemet që ka me fqinjët ballkanikë.
SHBA synon ta vulosë përfundimisht largimin e konfliktit nga Ballkani, që më pas të merret vetëm me Lindjen e Mesme.
Në muajin gusht, Sekretari amerikan i Shtetit, Rex Tillerson ka zhvilluar një bisedë telefonike me kryeministrin shqiptar Edi Rama, ku ka marrë përsipër që të negocojë me Athinën për Paktin e Detit.
Ndërkohë, enigma e madhe mbetet çështja e varrezave, për të cilën thuhet se ka një dakordësi, por nuk ka informacion se si do të zgjidhet. Një burim diplomatik bëri të ditur se Bushati ka marrrë përsipër të zbatojë marrëveshjen e arritur nga qeveria “Berisha” në vitin 2006 për këtë çështje.
Ndërkohë për çështjen çame gjithçka është lënë pezull dhe pritet të diskutohet gjatë vizitës së Kotziasit në Tiranë.
Në këtë dimension është rënë dakord që qytetarët shqiptarë me origjinë nga Çamëria do të lejohen të hyjnë në Greqi. /tesheshi.com/
