Në një vizitë në Dubai, sekretari i ri i përgjithshëm i OKB-së, Antonio Guterres, ka dhënë një intervistë për televizionin Al-Hadath, ku ka folur për një sërë çështjesh të nxehta rajonale, mes të cilave vend të posaçëm ka zënë konflikti sirian.
Guterres ka pranuar se kriza siriane ishte prova më e vështirë e ndikimit të OKB-së në botë, për të pohuar në të njëjtën kohë se ai nuk shihte në të ardhmen e afërt një mbarim të krizës së refugjatëve.
Sa për ISIS-in, me përhapje të konsiderueshme posaçërisht në Siri e Irak, sekretari i përgjithshëm i OKB-së e ka shpjeguar lulëzimin e kësaj organizate me mungesën e një zgjidhjeje politike të gjithmbarshme të konfliktit sirian.
Në këndvështrimin e tij, zgjidhja politike e krizës siriane do të çonte në fundin e ISIS-it.
Antonio Guterres nuk ka anashkaluar dhe bllokimin e emërimit të ish-kryeministrit palestinez Salam Fayyad si i dërguari i ri i OKB-së në Libi. Një vendim i SHBA-së, për të cilin Guterres shprehu keqardhjen e tij.
Zgjidhja me dy shtete është e vetmja për konfliktin izraelito-palestinez, është shprehur ai në intervistë, ndërsa e ka bërë të qartë kundërshtinë ndaj ndërtimit të ngulimeve izraelite në tokat e pushtuara palestineze. /tesheshi.com/
