Sekretari amerikan i Shtetit, John Kerry e gjen “shumë shqetësues” fjalimin e liderit suprem të Iranit, Ali Khamenei, sipas të cilit Irani do të sfidojë politikat amerikane në rajon pavarësisht marrëveshjes për programin bërthamor të Teheranit.
“Nuk di si ta interpretoj këtë fjalim në këtë pikë kohore, përvecse ta marr si një qëndrim, se kjo është politika e tij”, tha ai në një intervistë me televizonin al Arabiya, që zotërohet nga sauditët.
“Por, unë di që shpesh komentet bëhen publikisht por gjërat mund të evoluojnë në drejtim tjetër. Nëse kjo është politika e tyre, është shumë shqetësuese, problematike”, tha ai.
Ayatollah Khamenei u tha mbështetësve të shtunën se politikat amerikane në rajon ishin 180 gradë në drejtim të kundërt me ato të Iranit, gjatë një fjalimi në xhaminë e Teheranit, ku u dëgjuan edhe thirrjet: Vdekje Amerikës, Vdekje Izraelit!.
Disa shtete arabe të Gjirit e kanë akuzuar prej kohësh Teheranin për ndërhyrje, financiare dhe mbështetje të armatosur për disa lëvizje politike në vende si Bahreini, Jemeni apo Libani.
Kerry tha se Shtetet e BAshkuara besojnë se aleatët arabë kanë aftësinë të përballen me ndërhyrjen e Iranit në rajon./tesheshi/
