Boris Johnson do duhej të ishte të hënën në kryeqytetin rus për bisedime me homologun e tij. Por i pari takim i tillë që nga viti 2012, sipas The Guardian-it, nuk do të konkretizohet për shkak të anulimit të vizitës nga ana e sekretarit të Jashtëm britanik.
Anulimi vjen pas goditjes së Sirisë me raketa nga SHBA-ja dhe mbrojtjes së vazhdueshme të regjimit të Assad-it prej Moskës.
“Zhvillimet në Siri e kanë ndryshuar në mënyrë fundamentale situatën,” është arsyetimi që jepet për anulimin e kësaj vizite.
Në të njëjtën kohë, Boris Johnson deklaron si përparësi të tij vazhdimin e kontaktit me SHBA-në dhe me të tjerët për të garantuar një mbështetje ndërkombëtare për një armëpushim në terren dhe për një proces politik të intensifikuar.
Vetë Boris Johnson e ka bërë të qartë se, ndryshe tij, sekretari amerikan i Shtetit, Rex Tillerson, do ta bëjë vizitën e planifikuar në Moskë, për t’u përcjellë rusëve një mesazh të qartë dhe të bashkërenduar.
“Sjellje teatrale për mungesë argumenti,” ishte reagimi i ambasadës ruse në Londër për anulimin e vizitës së Johnson-it, shoqëruar dhe me një pjesë nga Çajkovski. /tesheshi.com/
