Në një fjalë të mbajtur në Uashington për të bërë të njohur rishikimin e politikës amerikane ndaj Iranit, Rex Tillerson e ka akuzuar Teheranin për provokime të vazhdueshme alarmuese që kërkojnë të destabilizojnë Lindjen e Mesme, si dhe të minojnë interesat amerikane në rajon.
Ai ka folur për një dështim të marrëveshjes bërthamore të vitit 2015 midis Iranit dhe gjashtë fuqive botërore, për mosarritje të objektivit të një Irani jobërthamor, e për vetëm shtyrje të synimit të tij për t’u bërë një shtet bërthamor.
Sekretari amerikan i Shtetit është treguar tejet i ashpër me Iranin, duke nënvizuar: “Kjo është arsyeja pse duhet ta shohim Iranin në mënyrë të gjithmbarshme, në lidhje me kërcënimin që paraqet në të gjithë zonat e rajonit dhe të botës.”
Tillerson ka lënë vend madje dhe për një krahasim mes Iranit dhe Koresë së Veriut, vend me të cilin SHBA-ja ka një përplasje të ashpër verbale gjatë ditëve të fundit.
“Një Iran i pakontrolluar ka potencialin për të ecur në të njëjtën udhë si Koreja e Veriut…”
Gjithnjë në lidhje me marrëveshjen bërthamore me Iranin, sekretari amerikan i Shtetit do të shtonte se, “Kjo marrëveshje përfaqëson të njëjtën qasje të dështuar të së shkuarës që na solli ne në kërcënimin e tanishëm me të cilin përballemi nga Koreja e Veriut.”
Donald Trump do ta cilësonte më herët këtë marrëveshje bërthamore, gjatë fushatës elektorale për zgjedhjet presidenciale, si më të keqen e negociuar ndonjëherë. /tesheshi.com/
