Ndërsa Ilir Meta, në rolin e kreut të Kuvendit të Shqipërisë e mbylli këtë legjislaturë për t’i hapur udhë zgjedhjeve të 18 qershorit, e rrugës është të ndodh një gjë e tillë sa më parë edhe në Kosovë, pra të shpërndahet Parlamenti dhe t’iu hapet rrugë zgjedhjeve të reja.
Këtë më së miri e tregon seanca e së enjtes se Kuvendit, ku që në fillim të saj deputetët treguan se sa të painteresuar janë të punojnë për çka ua tërhoqi vërejtjen kryesuesi i seancës, Xhavit Haliti, si dhe më pas akuzat mes deputetëve të koaliconit, derisa mbahej interpelanca me kryeministrin Mustafa, ku diskutohej çështjen e shfrytëzimit të thëngjillit dhe minierën e Sibovcit.
Deputeti i PDK-së, Haliti, disa herë kërkoi nga deputetët që të jenë në krye të detyrës, për çka janë zgjedhur nga qytetarët, e jo gjatë gjithë kohës të bisedojnë ndërmjet vete e të flasin në telefon.
“Me të vërtetë situatë e padenjë për të qenë deputetë”, u tha Haliti deputetëve, pasi nga ata disa herë me radhë kërkoi nga ta qetësi dhe të votojnë pro ose kundër Projektligjit për ndryshimin dhe plotësimin e Ligjit për miniera e minerale.
“LDK akuza ndaj PDK-së për zhvatje të KEK-ut”
Edhe vazhdimi i seancës vuri në pah se e ashtuqajtura “martesa e zorit” PDK-LDK, duhet të përfundojë sa më parë, pasi deputetë të saj drejtuan gishtin kah njëra-tjetra për zhvatje në kompani të ndryshme.
Deputeti i PDK-së, Shaip Muja, më i zëshmi ndaj qeverisë “Mustafa”, akuzoi ekzekutivin se po i mashtron qytetarët me ligje të paimplementueshme, duke thënë se “sa është investuar në Korporatën Energjetike të Kosvoës, ishin bërë dy KEK-a”.
Muja, edhe sot kërkoi largimin e qeverisë të cilën e quajti “qeveri e Riinvestit”, duke aluduar në atë se në këtë institucion të arsimit kanë hise kryeministri Mustafa dhe deputeti i LDK-së Muhamet Mustafa.
Ndaj, Mujës reagoi deputetja e LDK-së, Melihate Tërmkolli, e cila akuzoi disa zyrtarë të PDK-së se po e zhvatin KEK-un, porse nuk përmendi emra.
Sipas saj, KEK-un e kanë shkatërruar qeveritë e mëhershme, porse nga përgjegjësia nuk e ka amnistuar edhe qeverinë aktuale që drejtohet nga kryetari i partisë së saj, Mustafa.
“Nëse keni harruar janë ende në kontest gjyqësor kontratat që kanë lidhur zyrtarët e PDK-së me KEK-un të cilat nuk dihet si do të përfundojnë dhe për çfarë janë dërguar në gjykata, dhe kjo nuk është e fshehtë dhe që dikush po donë të vëjë në pah diçka, por janë fakte dhe argumente të cilat janë publike. Angazhimi kryesor i zyrtarëve të PDK-së në KEK shkoni vetëm bëni një kontroll dhe e shihni është punësimi enorm i militantëve partiake të PDK-së…Dhe KEK-un po e zhvatin edhe më tutje, dhe po e grabitin edhe më tutje, zyrtarë të PDK-së, përfshirë edhe ndonjë deputetë që po vajton këtu për KEK-un. I dini emrat më mirë se unë, që doni ua them edhe me emra se kush ka firma, kush po zhvat edhe kush po bën kontrata katastrofale milionëshe dhe që jeni nëpër gjyqe dhe tona. Mos hidhni gurë aty ku nuk mundeni me nxjerrë”, tha Tërmkolli.
Ndaj deklaratës së Tërmkollit reagoi Xhavit Haliti i PDK-së, duke i kërkuar asaj që nëse ka fakte konkrete le t’i dërgojë në prokurori apo të kërkojë edhe komision parlamentar hetimor, por mos të bëjë akuza të tilla.
Edhe, Shaip Muja, i replikoi Tërmkollit i cili tha se është turp të dëgjosh gjëra të tilla nga deputetët.
“Parafolësja hodhi disa pupla të cilat po mendon që publiku i han dhe i falënderoj shumë sepse këta kanë strategji ta gjuajnë topin diku tjetër për t’i ikur qëllimeve ku janë duke e bërë llugë. Nuk ka nevojë të thotë, PDK-ja ka emra, ka mbiemra, identitet. Kur po them, në këtë parlament ka papërgjegjësi publike edhe flasin veç në hava sa për ta dëgjuar elektorati, një elektorat që se merr vesh, ndoshta thotë me voton mua. Është e turpshme të dëgjosh duke fol gjëra të tilla, këtu nuk jemi duke folur për probleme politike personale, por për perspektiven e përgjithshme”, tha Muja.
Por deputetja Tërmkolli tha se KEK-un po e zhvatin disa zyrtarë të PDK-së, e jo PDK-ja.
“Unë di me thënë PDK-ja, por thash disa zyrtarë, i dini emrat, i keni në krejt mediat. Shkoni bëni një hulumtim më të vogël dhe kush kënd po e punëson, këqyrni a ka njerëz të Obiliqit, Bardhit të madh, këqyrni kush kënd po e punëson, janë gjëra të ditura”, tha ajo.
Ndryshe, këto akuza të LDK-së në drejtim të partnerit të koalicionit vijnë pas deklarimeve gjithnjë e në rritje të deputetëve të PDK-së se vendi duhet të shkojë në zgjedhje të reja, gjë që LDK-ja e Mustafës kërkon me ngulm që ta përfundojë mandatin i cili skadon në qershorin e vitit të ardhshëm.
Përgatiti: Blendi Gashi – /tesheshi.com/
