Nga Vepror Hasani
Tashmë lajmi i mirë ka mbërritur në çdo cep të vendit. Së shpejti Radiotelevizioni Shqiptar do të ofrojë për shikuesin e vet një sërë kanalesh dixhitale pa pagesë në gjithë Shqipërinë. Disa prej tyre mund t’i përmendim që tani: RTSH- HD, RTSH2- HD, RTSH3- HD, RTSH- Sport, RTSH- Film, RTSH- Muzikë, RTSH- Shqip, RTK (Radiotelevizioni Publik i Kosovës), RTSH- Lajme, RTSH- Reportazhe etj. Numri i kanaleve dixhitale falas do të jetë shumë më i madh se kaq; fillimisht 12. Bëhet fjalë për një lajm të madh, të shumëpritur dhe të ëndërruar prej vitesh nga shqiptarët. Bashkatdhetarët që ndodhen jashtë vendit, Televizionin Shqiptar mund ta njekin nëpërmjet satelitit (TVSH-Satelit), kudo që të jenë. Gama e produkteve do të jetë e larmishme dhe mbresëlënëse. Një armatë e madhe profesionistësh është vënë në shërbim të teleshikuesit të Radiotelevizionit Shqiptar.
Dixhitalizimi i mediave audiovizive është projekt madhor i Radiotelevizionit Shqiptar, investimet po përballohet tërësisht prej tij, nën kujdesin e Drejtorit të Përgjithshëm të Radiotelevizinit Shqiptar, Thoma Gëllçi. Tirana, Durrësi, Kavaja, Lushnja, Berate Kukësi, Pogradeci, Korça, Gjirokastra etj kanë qenë ndër të parat që u pajisën me stacione të reja transmetimi. Procesi i nisur me Radiotelevizionin Shqiptar do të vijojë me operatorët privatë. E tjetërsuar do të shfaqet edhe Radio Tirana me tri stacionet e saj: Radio Tirana, Radio Tirana 2 dhe Radio Tirana 3.
Mjafton një dekodër DVB-T2
Programet e dixhitalizuara mund të shihen nga kushdo, pavarësisht nga televizori nëse është tip ri apo i vjetër, mjafton të pajiset me dekoderin DVB-T2, kurse për familjet që janë në vështirësi ekonomike, pajisja do të subvencionohet nga shteti. Kjo teknologji e standarteve europiane mundësohet prej kanalit 34 UHF. Cilësia e figurës dhe e zërit është e nivelit më të lartë bashkëkohor, realizuar prej kompanisë gjermane Rhode&Schwarz. Dixhitalizimi mundëson për publikun shumëfishimin e kanaleve të transmetimit, shikueshmëri më të lartë prej tij, pasi televizionet nuk do të mund të operojnë më si parë, përmes skemave të tipit: lajme me vëmendjen te politika – programe argëtuese – filma – reklama dhe kaq.
Koha televizive për politikën do të kalojë në plan të dytë. Publiku gjithnjë e më shumë do të përzgjedhë nga shumëllojshmëria e programeve që do t’i ofrohet, veçanërisht sportin, filmin, dokumentarin, humorin, programet për fëmijë, spektaklin, temat sociale, emisionet edukative, informuese, investiguese, shëndetësore etj, por jo aq shumë politikë sa është konsumuar deri më sot.
Televizioni shqiptar, surprizë e përhershme
Burime pranë Drejtorisë së Përgjithshme bënë të ditur se Radiotelevizioni shqiptar ka për të qenë surprizë e përhershme për adhuruesit e lajmit dhe të informacionit, të sportit, teatrit, kinematografisë, muzikës, filmit, pikturës etj. Për të gjithë do të përgatiten programe cilësore. Shumë shkurt mund t’ju bëjmë të ditur çfarë do të ketë për sportdashësit në 5 vitet e ardhshme: Europiani 2020 (faza finale), Nations League 2018/2019, Nations League 2020/2021, Ndeshjet kualifikuese të Kombëtares për Euro 2020 dhe Botërorit 2022, Kupa e Konfederatave 2017 (ekskluzive), Kupa e Botës Rusi 2018 (ekskluzive), Kupa e Konfederatave 2021 (ekskluzive), Kupa e Botës Katar 2022 (ekskluzive).
Do të transmetohen edhe një sërë ekskluzivitetesh të tjera si: MOTO GP, Europa League, Kualifikueset e Evropës për Botërorin 2018, Kualifikueset e Amerikës Latine për Botërorin 2018, Euroleague, NBA (fazat finale), Roland Garros, Tour de Francë, Kampionati Botëror i Atletikës, Londër 2017, Kampionati Shqiptar i futbollit, Superliga (1 ndeshje në javë), Kampionati Shqiptar i futbollit, Kategoria e parë, Ndeshjet e ekipit Kombëtar U 21, Kampionatet kombëtare të lojrave me dorë dhe Përfaqsueseve shqiptare të tyre, e shumë të tjera.
RTSH-ja ekrani kryesor i shqiptarëve
Thoma Gëllçi, Drejtori i Përgjithshëm i Radiotelevizionit Shqiptar, i pyetuar në lidhje me procesin e transmetimeve dixhitale që do t’i ofrohen së shpejti publikut shqiptar, tha: “Ëndërroja gjithnjë për një televizion publik në shërbim të publikut, ku flitet për njerëzit, hallet, shqetësimet e gëzimet e tyre, ku ata janë në qendër të vëmendjes, dëgjohet mendimi i tyre dhe bëhen personazhe të programeve tona. Besoj se ëndërra ime po realizohet. Në pak kohë bëmë transformimin e plotë të Radiotelevizionit shqiptar. Shumë shpejt, pa asnjë pagesë shtesë, RTSH-ja do të çojë në familjet e shqiptarëve, përmes kanaleve të shumta, lajmin dhe jetën reale të njerëzve, humorin, filmin, teatrin, koncertet, festivalet, sportin, reportazhin, programet argëtuese e gjithçka tjetër që shkon në shërbim të publikut. Në ditë festash do të çojmë gëzim në shtëpitë e tyre përmes programeve të realizuara me përkushtim, fantazi e profesionalizëm. Do të rrisim bashkëpunimin me televizionet e huaja. Jam i sigurtë që Radiotelevizioni shqiptar do të jetë ekrani kryesor i shqiptarëve, konkurues i denjë në tregun mediatik”.
Konkurenca në plan të parë
Me dixhitalizimin kalohet nga transmetimi analog në atë numerik, rritet ndjeshëm numri i kanaleve, konkurenca bëhet më e fortë, shmanget përfundimisht monopoli në tregun mediatik. Kërkohen investime më të mëdha dhe teknologji bashkëkohore. Vëmendja përqëndrohet te cilësia e programeve, te shumëllojshmëria e tyre dhe te profesionalizmi. Tregu përcakton renditjen e televizioneve; kush është i pari, kush i fundit dhe kush del nga tregu mediatik. Dixhitalizimi ofron mundësi për hyrjen në treg të operatorëve të rinj, pasi edhe numri i licensave kombëtare do të rritet. Seleksionimi mbetet proces i përhershëm që nuk fal askënd. E drejta e autorit do të respektohet dhe nuk do të ndodhë më si më parë. Gjithkush e gjithçka zë vendin e vet. Kërkohet të jesh më i miri; kjo është çështja. Nga të gjitha këto përfiton publiku shqiptar. Rrjetet kabllore për shkak të dixhitalizimit do të ulin çmimet, e njëjta gjë pritet të ndodhë edhe me tarifat e reklamave, gjë që do të rrisë mundësinë për një numër më të madh biznesesh që mund të reklamojnë shërbimet e tyre. Gjithashtu përfitues do të jetë edhe Televizioni Publik shqiptar, i cili vë në dispozicion të operatorëve lokalë platformën e ngritur nga vetë ai, prej së cilës do të sigurojë të ardhura të plus, të cilat do të shkojnë për shikuesin e tij. Kjo është dhe një arsye më shumë pse Drejtori i Përgjithshëm, Thoma Gëllçi, thotë: “Jam i sigurtë që Radiotelevizioni shqiptar do të jetë ekrani kryesor i shqiptarëve”. /tesheshi.com/
