Skuadra e Sandërlendit ka qenë për një pjesë të mirë të sezonit në zonën e rënies nga kategoria, por ia ka dalë në fund të qëndrojë në futbollin elitar anglez.
Në një ndeshje vendimtare një javë para mbarimit të Premier League-s, Sandërlendi ka qenë me fat kur është përballur me një Everton të pamotivuar, tërësisht jashtë forme.
Fitorja ka qenë bindëse, 3-0, për vendasit, që në fund kanë marrë frymë lirisht. Goli që ka prishur barazimin e fillimndeshjes është shënuar nga Van Aanholt drejt fundit të pjesës së parë, i shoqëruar nga dy gola të Kone-s në pjesën e dytë të lojës.
Noruiçi do të fitonte 4-2 ndaj Uotfordit, një rezultat që vlen veç për statistika.
Kështu, Njukasëlli dhe Noruiçi i janë bashkuar Aston Vilës, si tre ekipet që sezonin tjetër do të luajnë një kategori më poshtë, në Championship.
Kur duhet të luhen dhe ndeshjet e javës së fundit të Premier League-s, Liverpuli dhe Çelsi janë përballur mbrëmë në një takim të prapambetur. Pa asnjë objektiv, dy ekipet janë ndarë në barazim. Rezultati 1-1 u fiksua falë golave të Hazard-it për Çelsin dhe të Benteke-së për Liverpulin. /tesheshi.com/
