Samiti i 27 Gushtit i vendeve të Ballkanit Perëndimor në Vjenë nuk do të ketë vetëm bisedime politike dhe ekonomike, por edhe argëtim. Inicuar nga kancelarja gjermane, Angela Merkel për të nxitur bashkëpunimin në rajon, samiti do të shoqërohet edhe me një ndeshje futbolli, raportojnë mediat serbe.
Agjencia serbe e lajmeve Tanjug njofton se në kuadër të samitit pritet të luhet edhe një ndeshje miqësore futbolli mes drejtuesve ballkanikë. “BE e ardhshme” dhe “BE” janë skuadrat që do të ndeshen mes tyre.
Në ekipin “BE e ardhshme”, do të luajnë kryeministri Edi Rama, ministri i Jashtëm i Kosovës Hashim Thaçi, kreu i Qeverisë së Beogradit, Aleksandar Vuçiç, ministri i Jashtëm malazez, Igor Lukshiç, homologu i tij maqedonas Nikola Popovski, ministri i Jashtëm boshnjak Crnadak, Ministri i Jashtëm i Shqipërisë, Ditmir Bushati, ministri i Ekonomisë nga Shqipëria, Arben Ahmetaj dhe sekretari i procesit të bashkëpunimit rajonal, Goran Svilanoviç.
Isa Mustafa, si Kryeministër i Kosovës, nuk do të jetë përkrah homologëve të tij nga Shqipëria e Serbia.
Ndeshjen do ta gjykojë Komisioneri Europian Johanes Hahn, ndërsa në ekipin e BE-së, do të jetë pjesëmarrës kryeministri i Sllovenisë, Miro Cerar dhe ministri i jashtëm austriak Sebastian Kurz. /tesheshi.com/
