Samiti i vendeve të Ballkanit Perëndimor, që mblodhi në Vjenë kryeministrat e rajonit dhe liderët europianë doli në përfundim të punimeve, me një deklaratë të përbashkët, ku ata angazhohen për shkëmbime të ndërsjellta mes studentëve.
Hapat e përbashkët për të hedhur ura afrimi mes të rinjve në rajon, si një aspekt i rëndësishëm për integrimin europian, theksohet si pikë e parë e deklaratës e cila vijon me angazhimin për të ndjekur shembujt më të mirë europianë në mënyrë që të shërohen plagët e së shkuarës.
Samiti vendosi edhe krijimin e një Zyre Rajonale për Bashkëpunimin Rinor në Ballkanin Perëndimor, si një strukturë që do të koordinojë bashkëpunimin rajonal e që duhet të jetë e ngritur derii më 1 mars 2016.
Inkurajimi dhe ndihma ndër të rinjtë në rajon, për të luftuar dhe distancuar veten e tyre nga fenomenet e racizmit, ksenofobisë dhe gjuhës së urrejtjes, diskriminimit në baza etnike, fetare dhe gjuhësore, ndërtimi I një platforme për shkollimin profesional në fushat e IT-së, infrastrukturës, turizmit dhe energjisë, në përputhje me nevojat specifike të vendeve janë edhe pika të tjera të deklaratës. /tesheshi.com/
