Samiti i G20 që mbledh liderët e 20 ekonomive më të fuqishme të botës këtë vit mbahet për herë të parë në Kinë. Liderët e shteteve kanë në axhendën e tyre bisedime për mënyrat sesi duhet të nxitet rritja ekonomike globale, mes parashikimeve të zymta nga ana e institucioneve financiare.
Në hapje të samitit, presidenti i Kinës, Xi Jinping apeloi të pranishmit, drejtues të 20 ekonomive më të mëdha të botës të shmangin “llafet e kota” ndërsa përpiqen të diskutojnë rritjen ekonomike. Presidenti Xi theksoi se ekonomia globale po rimëkëmbet, mirëpo përpara ka shumë sfida në financa dhe në tregti.
Në tryezën e samitit, ka edhe tema të tjera të rëndësishme si ndikimi ekonomik i votës Brexit dhe taksimi i kompanive shumëkombëshe si p.sh Apple.
Përpara samitit, FMN paralajmëroi se ka gjasa të ulë parashikimin e saj për rritjen ekonomike këtë vit. FMN e ka ulur parashikimin edhe një herë gjatë vitit, pas votës Brexit duke reduktuar përqindjen e rritjes ekonomike në 3.1 për qind në vitin 2016 dhe 3.4 për qind në vitin 2017. /tesheshi.com/
