Nga Blendi Gashi
Ish-kryetari i Skenderajt, Sami Lushtaku, ka ndërprerë grevën e urisë pasi kryetari i trupit gjykues ia ka lejuar që të trajtohet në Qendrën Klinike Universitare të Kosovës, pasi ka probleme shëndetësore.
Lajmin e daljes nga greva e ka konfirmuar për tesheshi.com avokati i Lushtakut, Arianit Koçi.
Ai ka thënë se Lushtaku do të jetë në QKUK për trajtim derisa të rekomandojnë mjekët.
“Zoti Lushtaku e ka ndërprerë grevën e urisë për shkak se qëllimi është arritur. Kryetari i trupit gjykues ia ka lejuar që të trajtohet në QKUK ashtu siç i kanë rekomanduar mjekët. Ai ka qenë mbrëmë dhe sonte do të jetë në QKUK. Pastaj nga nesër sipas rekomandimeve të mjekëve do të shohim si do të vazhdojë trajtimi i tij mjekësor”, ka thënë Koci për tesheshi.com.
I pyetur për gjendjen aktuale të Lushtakut, avokati Koci ka thënë se sot i është përmirësuar gjendja pasi ditë më parë ishte në gjendje të rëndë.
“Sot është më mirë. Gradualisht po përmirësohet”, ka deklaruar Koci për tesheshi.com.
Lushtaku ka hyrë në grevë urie në burgun e Sigurisë së Lartë për shkak se nuk është lejuar të trajtohet në QKUK pas problemeve me shëndetin.
Avokati i Popullit, KMLNDJ, Amnesty International, etj., kanë thënë se Lushtakut po i shkelën të drejtat themelore të njeriut me moslejimin e trajtimit të duhur. /tesheshi.com/
