Pasuria totale e miliarderëve të botës u rrit me dy trilion dollarë vitin e kaluar, tre herë më shpejt se në vitin 2023 dhe pabarazia globale po rritet, sipas një raporti të OJQ-së Oxfam.
Pasuritë e njerëzve më të pasur u rritën me 5.7 miliardë dollarë në ditë vitin e kaluar.
Numri i miliarderëve në botë u rrit me 204 vitin e kaluar – në 2769. Pasuria e tyre e kombinuar u hodh nga 13 trilion dollarë në 15 trilion dollarë në vetëm 12 muaj, rritja e dytë më e madhe vjetore që nga fillimi i regjistrimeve.
Pasuria e dhjetë njerëzve më të pasur në botë u rrit mesatarisht me pothuajse 100 milionë dollarë në ditë vitin e kaluar, thuhet në raport.
Raporti i fundit i pabarazisë zbulon se bota tani është në rrugën për të pasur pesë njerëz me një pasuri prej pesë trilion dollarë brenda një dekade.
Nën kufirin e varfërisë
Në të kundërt, numri i njerëzve që jetojnë nën kufirin e varfërisë, i cili sipas përkufizimit të Bankës Botërore është 6.85 dollarë në ditë, ka mbetur praktikisht i pandryshuar që nga viti 1990 dhe është pothuajse 3.6 miliardë, që përfaqëson 44 për qind të popullsisë së botës.
Raportohet se një në dhjetë gra në botë jeton në varfëri ekstreme, ose nën pragun e 2.15 dollarëve në ditë, raporton The Guardian.
Oxfam ka paralajmëruar se përparimi në reduktimin e varfërisë ka ngecur dhe se varfëria ekstreme mund të përfundojë tre herë më shpejt nëse pabarazia do të reduktohej.
Organizata bën thirrje për zgjidhje të guximshme për të “ulur rrënjësisht pabarazinë dhe për të futur drejtësinë në ekonomi”. /tesheshi.com/
